大埔之友好幸福，區內有好多邪惡炸雞髀店，晚晚宵夜食一隻都唔知點算！今次試咗 3 間區內炸髀店，包括出晒名嘅「三多」、傳聞係三多班底但未能證實嘅「好好食品」、仲有新丁「大埔友．手抓餅專門店」，睇下邊間最好食。比拼前，先睇下點樣為之一隻完美炸雞髀！
1. 色澤：外皮炸得金黃，不會過濃呈啡黑色。
2. 分量：愈大隻愈好，愈脹卜卜愈好；我會以間呎量度炸髀長度，鬥大隻及啖啖肉分量。
3. 肉質味道：食雞髀最忌外皮香脆，但咬落肉有雪藏味，如果雞肉無雪味、有彈性就 perfect！
4. 價錢：炸髀再好食，都要睇價錢，又平又靚就最好啦！
1. 大埔友．手抓餅專門店 17分
大埔區新開小店「大埔友．手抓餅專門店」，開業四五個月，但以料多入味的台式手抓餅而聞名，吸引好多大埔友幫襯。老闆 Kidman 指炸髀本身只係整畀朋友試食，點知評價勁好，才決定賣；入雞髀時要逐隻逐隻揀，務求肉質靚又大小均一，有要求㗎！
| 評分： 色澤：★★★★★（5 分為標準） 分量：★★★ 肉質味道：★★★★ 價錢：$23 ★★★★★ |
外皮炸成金黃，睇賣相都已覺得好正，另外明顯見到是雞皮炸脆，並非炸粉漿顏色。
炸髀長度仲長過手掌，用間呎度足足有 6.8 吋長，而且因為炸粉漿少，無呃秤。
即叫即炸咬落熱辣辣，肉質幼嫩無雪味；由於炸粉漿少，最邪惡嘅雞皮完全被油炸香，加上辣粉吊味，好香口。
喺三間小店中價錢最平嘅一間，分量、味道高質，$23 性價比極高！
大埔友‧手抓餅專門店
地址：大埔廣福道 103a 舖
電話：6626 8818
營業時間：1pm - 1am
facebook: 大埔友‧手抓餅專門店
2. 三多炸髀 16分
大埔名物「三多」炸髀聞名九龍新界，現時分店愈開愈多，繼元朗、荃灣以外，嚟緊仲會去粉嶺開新店。本身要宵夜時段先有得食嘅炸髀，因為喺太和開了新店兼設堂食，每日 3pm 就食到，即叫即製，需等 10-15 分鐘，皮脆兼大大隻，最緊要唔太油膩，已成為炸髀迷朝聖地。
| 評分： 色澤：★★★★ 分量：★★★ 肉質味道：★★★★★ 價錢：$28 ★★★★ |
炸髀顏色金黃，只有小部分呈深啡色，但整體上吸引。有枝竹籤貫穿成隻髀，即使熱辣辣都可拎住食。
整隻炸髀同手掌咁大，有 6.8 吋長，與「大埔友」出品相若。
邪惡雞皮粉漿不算多，揭開雞皮下仍可見脂肪，又話肥又要食矛盾吃貨可能會有懺悔感，不過油香十足，肉質嫩滑，咬落多汁，加上自家製辣粉好惹味。接近三十蚊隻炸髀，有少少肉赤，但質素高，可以接受。
三多炸髀
地址： 大埔翠樂街 8 號美豐花園 B 座地下
電話：5402 2024
營業時間：星期一至四 3pm-1am、星期五 3pm-2am、星期六、日及公眾假期 2pm-2am
facebook:三多 - 翠樂街第一分店
3. 好好食品 12分
匿藏在太和舊墟近林村河位置的「好好食品」，深夜時段好多街坊叔叔、嬸嬸、年輕夜歸人聚集店前啤一啤，傳聞小店係隔離舖「三多」班底員工，小記八卦過，職員笑而不語，只回答「食過咪知！」，咁神秘一於就先食為快。
| 評分： 色澤：★★ 分量：★★★★★ 肉質味道：★★ 價錢：$35 ★★★ |
整隻炸髀顏色呈啡色，雖然咬落香脆，無乜雞味，但賣相是有點遜色。
小店有兩隻 size 嘅炸髀選擇，最大隻最馳名嘅係「一巴掌生炸雞髀」足足有 8.7 吋咁長，完全大過隻手掌！份量十足一個人未必食得晒，係比拼中最大隻嘅炸髀！
加入辣粉後好惹味，不過雞肉略嫌乾身及嚡口，油炸嘅時間長咗，不過粉漿唔算多，仍然吃到香脆雞皮。
三間小店中價錢最貴，不過炸髀 size 亦是最大。
好好食品
地址：大埔北盛街 15 號地下 A 舖
電話：2657 1186
營業時間：8pm-3am
文、攝：Celia
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
