港九新界 4 大人氣叉燒飯 邊碗最好食?

發佈: 2016.09.01
文:

成日都畀呀媽鬧「生嚿叉燒好過生你」!睇吓!一嚿叉燒竟然可以同自己嘅親生骨肉相題並論,叉燒喺香港人心目中嘅地位真係好高!加餸斬料會揀叉燒、去完外地旅行返到嚟香港,都會第一時間諗起叉燒!剛出爐叉燒鋪於熱辣辣的白飯上面,淋上叉燒汁或豉油,那種滋味真係難以抗拒。靚叉燒飯,港、九、新界都有人氣之選,港島區最出名有再興和新桂香,九龍有永合隆,新界又有添記,間間叮噹馬頭,邊間最好食最足料?即刻比拼下!

一碗靚叉飯是這樣的……
1. 顏色:叉燒要帶有光澤,外層掃上蜜糖,會閃亮亮;同時光澤應該由內至外發出, 因為於製作時的回爐步驟中,會將蜜糖燒入表皮內,絕對唔係單睇表面。色水方面,雖然都係紅色,但紅得嚟都唔可以太鮮太唔自然。
2. 口感︰乾到柴皮的叉燒應該無乜人欣賞!叉燒要嫩滑軟腍、有咬口得來鬆化、食落無渣又唔嚡口,最緊要有肉汁。最好是脢肉部位,即是豬頸後背脊位置,肥瘦比例各佔一半。另外,叉燒要有一定厚度, 入口才會有嚼勁及口感。
3. 味道:叉燒第一大忌:有雪味!急凍肉的肉質又乾又硬,仲會有陣陣雪味,影響晒成碟叉燒飯!靚叉當然要有豬肉的香味,隨後再有蜜糖的香甜,海鮮醬及蒜等醃肉醬料的味道,味道層次先夠豐富。
4. 分量:梗係愈多愈好啦!有叉燒送晒成碗飯之餘,仲可以空口食多幾嚿,你話幾開心!
5. 飯:白飯要飽滿,太乾身的飯粒好硬、加太多水煮成的爛飯,豉油汁鹹甜度和分量都要適中。



元朗添記 13分
藏身於建業街冬菇亭熟食中心,半露天無空調,但仍然吸引唔少人去開餐。廚房有兩部不銹鋼炭燒太空爐,燒味每日只燒 3 轉, 全部都是限量供應,賣完就收檔,手快有手慢無!如果唔想撲空, 可以於朝早 8 點打電話預留燒味。

評分:
1. 顏色:★★(以 5★最高分)
店家不用色素,只用玫瑰露醃,所以顏色較淺色,呈粉紅色。叉燒的光澤度較低,表面沒有蜜汁的光潤,中間的肉又有點乾,賣相一般。
2. 口感︰★★★
叉燒睇落乾身,而且以瘦肉為主、無乜脂肪,但食落又是另一回事! 肉質有嚼勁得來腍滑,唔會太乾。可惜叉燒切得比較薄,食落少咗種滿足感。
3. 味道:★★★★
用街市買新鮮豬肉炮製,調味不算重,但叉燒有豬肉的鮮香味,又有炭火燒烤的炭味,外間難尋。一食好有驚喜! 可惜叉燒無乜燶邊位,少咗香口的感覺。
4. 分量:★★★
全碗飯共有 13 片叉燒,重 109 克。
5. 飯:★
飯的分量是眾店中最少,只得一個飯碗的分量,男士們食完可能只是剛剛夠飽。白飯明顯乾身、飯粒好硬,又沒太多豉油汁, 乾爭爭。



全碗飯有 13 片叉燒,重 109 克,分量不算多。


白飯太乾又不夠汁。

添記燒臘飯店

地址:元朗建業街熟食亭 C5(近建業街交界)
電話: 2476 1742
營業時間: 8am-2pm

太子永合隆 22 分
九龍區的代表有太子永合隆,它是市區少有以炭火直燒嘅燒味店, 爐火力均勻。永合隆的燒肉出名就好多人都知,就連發哥都是捧場客 。不過叉燒都好好賣,下次食唔到出爐燒腩,可以改食叉燒

評分:
1. 顏色:★★★★
有色澤但唔會有厚厚的蜜汁搞到「令立立」,中間的肉唔乾身。
2. 口感︰★★★★★
叉燒肥瘦均勻,肉質軟腍之中又有點彈口。瘦肉之間有薄薄一層脂肪 ,咬落鬆化。叉燒有肉汁滲出,無渣又唔嚡口,厚薄度適中。
3. 味道:★★★★★
醃味剛好,鹹中帶甜又不會蓋過豬肉的味道,入味之餘又不失豬肉香 ,兩者平衡得好好!
4. 分量:★★★★
全碗飯共有 9 片叉燒,重 130 克,重量排第二!
5. 飯:★★★★
足足有兩大碗白飯,分量最足!白飯爽身、粒粒分明,質感不錯。加埋自家調配的豉油,不會死鹹,好惹味。



叉燒切得厚薄適中,瘦肉之間有薄薄一層脂肪,有肉味又有油脂甘香。


雖然得 9 件,但分量都算足。

永合隆飯店

地址:太子砵蘭街 392 號
電話:2380 8511
營業時間:11am-10pm

灣仔再興 23分
開業至今半世紀仍屹立不倒,2014 年憑港式燒味成功殺出重圍, 首次獲得「車胎人美食推介」!鎮店之寶叉燒每日賣近 2,000 條,老闆話每日凌晨 3 點就要起身準備材料,花盡心機製作。

評分:
1. 顏色:★★★★★
叉燒富有光澤,表面的蜜糖閃閃發光,中間的肉望落唔會乾爭爭,睇見都想食!
2. 口感︰★★★★★
叉燒好軟腍,兩層瘦肉中間夾了一層脂肪,肥瘦相間,食落特別鬆化,咀嚼時油脂滲出,令肉質更油潤,好食!最正是叉燒勁厚切,最厚一嚿仲厚過一雙外賣筷子,食得好滋味。
3. 味道:★★★★
由於蜜汁比較多,所以味道比較甜,醃料的薑蒜味好突出,反之豬肉香味不太明顯。 叉燒有燶邊位,咬落有焦香。整體來說很惹味。
4. 分量:★★★★★
全碗飯共有 9 片叉燒,重 139 克,眾店之中最足料 。
5. 飯:★★★★
分量約有一碗半,白飯有飯香而且可以吸到叉燒汁的香味。可惜飯粒比較濕又軟身,口感差咗少少!



厚切叉燒肥瘦相間,口感好之餘,油香肉香兼備。


同樣是 9 件,重 139 克,分量稱霸。

再興燒臘飯店

地址:灣仔軒尼詩道 265-267號地下
電話:2519 6639
營業時間:10am-10pm

柴灣新桂香 13分

於柴灣開店 10 多年,區內無人不識。燒味店的所有食材都是新鮮貨,叉燒用新鮮脢頭肉製作。每日出爐 4 次,肥瘦比例 3:7, 可惜今次 battle 只買到肥叉

評分:
1. 顏色:★★★★
叉燒有適當的光澤,可能是因為叉燒脂肪多,瘦肉部分有光澤。
2. 口感︰★★★
肥叉屬薄切,可能因為脂肪多,結果切得太厚的話,食落會好油好飽滯,呢個絕對是細心位!肉質腍滑,但脂肪大都聚集在邊位,無咗肥瘦相間口感。
3. 味道:★★★
肥肉太多,實在難以評估叉燒有無豬肉香,不過可以食得出醃味不會過鹹,仲帶有陣陣甜味,唔錯。
4. 分量:★
全碗飯共有 13 片叉燒,重 93 克。
5. 飯:★★
有兩平碗飯的分量,飯粒飽滿,唔會結成一嚿嚿。飯粒滲有自家調製的豉油,但分量不夠多。



因為係肥叉,切成薄片,膩感大減。但脂肪集中在邊位,欠缺層層疊口感。


只有 93 克,分量薄弱咗啲。

新桂香燒臘

地址:柴灣柴灣道 345 號金源洋樓地下 17 號
電話: 2556 1183
營業時間: 8am-9pm

比賽結果:再興 勝!
半世紀老字號加車胎人美食推介,果個唔係浪得虛名! 叉燒質地軟腍得嚟有咬口,肥瘦均勻!醃得好惹味,有燶邊位令叉燒更加香口!叉燒做得出色,都唔錯! 雖然飯身較軟,但有飯香,吸埋叉燒嘅香味,一碗叉燒飯輕易食晒!而亞軍的永合隆,同再興叮噹馬頭,叉燒的味道係眾多對手中最平衡的,惹味得來又有肉香,係九龍人首選。

文:Jessie、攝:Brian

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more