呢間進駐深水埗西九龍中心 8 樓 Food Court 的喇沙專門店，由老闆陳生一手打理。入貨、熬湯、煮麵、收錢一腳踢；老闆做埋廚師，質素唔會差得去邊。陳生曾經受邀到新加坡做西廚，回後來覺得香港人愛食喇沙，將正宗新加坡喇沙嘅味道帶返香港，應該受歡迎。於是專程拜師學藝，到當地嘅喇沙店邊做邊學，兩個月前正式於西九龍開舖。小店主要賣新加坡叻沙及泰式冬蔭功兩款湯底嘅麵食，每款均有牛脷、豬扒、雞扒、海鮮等餸菜選擇，啱晒心多多又鍾意揀嘅香港人。
大蝦喇沙麵 $45（包紙裝飲品）
喇沙湯底落足心機製作，陳生會先以雞骨及豬骨以慢火熬煮基本嘅雞湯底。另外以烤焗過的蝦殼煮湯，加入南薑、黃薑、辣椒粉、蝦米、蝦膏、香茅、特製辣椒醬和雞湯再煮 2 小時而成，每 100 碗湯就用到 2 斤蝦殼熬，都算足料。配料有越南大蝦，蝦肉尚算爽彈；同喇沙湯的蝦味好夾。
豬扒喇沙麵 $45（包紙包裝飲品）
豬扒勁大塊，同個湯碗一樣咁闊，大過小記隻手掌！質感好腍，沒有鬆肉粉的味道，仲帶有少許黑椒味。
湯底色澤亮麗，湯面浮起一層辣油。取餐時老闆會貼心提醒喇沙湯比較辣，怕太辣可以另加雞湯沖淡。不過湯底嘅辣味其實唔會好嗆，辣度適中。椰漿味恰到好處，不會太濃稠而變得好滯，仲會滲出陣陣蝦的香味。
陳生試過用本地油麵，發現麵條好易變腍，未食到一半就發脹，變得糊口。他轉用上海麵，質地煙韌有嚼勁。麵條呈四方型，起角的麵條更容易掛湯。
牛脷冬蔭功米綫 $42（包紙包裝飲品）
冬蔭功湯底是以自家雞湯做 base，再加魚塊、蜆、魷魚、青檸、香茅、薑及檸檬葉煮成。湯底香料味不濃，味道較酸，感覺清爽。
牛脷 size 唔細，大過隻湯匙！牛脷放進加入了黑椒粒、香葉及西芹的湯內炆兩小時，有柯打再切片煎香，食落軟腍兼無渣，煎香後更加惹味。
喇沙專門店
地址：欽州街 37K 號西九龍中心 8 樓美食廣場 8F24 號
電話：5715 5527
營業時間：11:30am-9:30pm（逢星期三休息）
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
