平絕粥麵套餐 東莞佬粥店
上水街坊食 lunch 嘅最好地方，一定係石湖墟街市 2 樓嘅熟食中心。皆因好多茶記都好鬼平，小記童年住喺上水，最常去嘅就係「東莞佬粥店」。每次必食佢嘅菜乾豬骨粥，菜乾煲得軟腍，粥底充滿菜乾香，而且豬骨落足料，成底粥又綿又滑。另外佢嘅豉油王炒麵又係必食，雖然稍為多油，但麵底炒得爽滑彈牙，芽菜又落足料。最後不得不提嘅係炸兩，油炸鬼好脆，連爽滑腸粉皮，放耐啲都唔會變腍。記得中午前就嚟到喇！Lunch 之後好快賣晒。
溫馨提示，去「東莞佬」要吃得精明一定係叫套餐，$23 就有一碗粥+腸粉 / 炒麵 / 油條 + 菊花茶 / 豆漿，抵！
豉油王炒麵雖然有點油，但麵身炒得爽口均勻，芽菜亦落足料。
菜乾豬骨粥係必食，除咗菜乾、豬骨夠足料，更落埋蠔豉仔吊味；粥麵餐連飲品都係 $23，平絕。
另一名物係炸兩（$14），中午過後好多時就賣晒，想食趁早。
粥舖食物價廉又好食，成個餐牌貼上牆客人自己睇。
東莞佬由開檔到收舖一刻都係好多好多人。
東莞佬粥店
地址：上水智昌路 13 號石湖墟市政大廈 2樓 CF9 號鋪
電話： 2672 0028
營業時間： 6am-3pm
包住菠蘿嘅蛋 明記美食
就喺東莞佬隔籬嘅「明記美食」，製作另一樣街市名物—菠蘿蛋！咩係菠蘿蛋？其實係將炒蛋包住煎香咗嘅菠蘿包，好似奄列咁！煎香嘅味道有點似西多士，中間流出蛋汁，好邪惡！如果唔怕肥，再加牛油更好味！茶檔靚姐話好多年輕人假日都嚟食菠蘿蛋，又係會在中午賣晒，公眾假期去食都係要趁早！
菠蘿蛋 $13
炒得香濃嘅蛋，包着微甜菠蘿包，再配一杯熱奶茶，真係幸福滿瀉。
明記坐位不多，主要供應三文治類小食。
明記美食
地址：上水石湖墟市政大廈 2 樓 10 號舖
電話：2668 6646
營業時間：6am-5:30pm
馬來亞風味咖喱 輕鬆美食
只有上水地膽先會去嘅咖喱店，就係「輕鬆美食」。主打馬來亞風味嘅香濃咖喱，落重香料、椰奶，令咖喱汁非常杰身，用來撈飯一流！另外牛腩做得好入味又無筋，海南雞飯雞肉都好嫩滑，見多數食客都點呢幾款食物，就知係招牌啦！
咖喱乾煎雞扒飯（$55），上水食店來說不便宜，但食落就知值得：雞扒煎得香口，外皮香脆，加上濃濃咖喱汁，配白飯一流。
馬來亞咖喱汁加入大量椰奶及香料炮製，顏色較淺及杰身，食落好濃椰香味，又不太辣。
隨飯有馬來特式西多士，將麵包炸得脆卜卜，點咖喱汁食特別惹味。
食店內有約有廿個座位，午市經常爆滿。
輕鬆美食
地址：上水智昌路順欣花園一座 8 號地下
電話：3142 4220
營業時間：11am-10pm
又鹹又甜椒鹽雞蛋仔 潮食
上水唔多小食檔，而「潮食」算係最潮之一。獨沽一味雞蛋仔，好幾款新口味雞蛋仔很受歡迎，包括抹茶朱古力、焦糖蛋、清香水果皮雞蛋仔等等。我買咗賣相同配搭最過癮嘅椒鹽蛋雞蛋仔，蛋漿之上再打一隻鮮雞蛋，再灑上椒鹽，撕開見到兩層蛋之間再夾着雞蛋，食落有鹹鹹哋嘅椒鹽味，好特別，雞蛋控必食！
椒鹽蛋雞蛋仔 $15
雞蛋仔中間見到多一層雞蛋，食落椒鹽調味微鹹，口感豐富。
撕開中間，兩層雞蛋仔中間又多一層蛋，雞蛋控見到實尖叫。
在順欣花園一帶人流不多，附近學生經常買雞蛋仔食，食到出哂名。
潮食
地址：上水智昌路 8 號順欣花園地下 5C 號舖
電話：從缺
營業時間：星期一至六 1pm-8pm、星期日休息
只此一間好 hea Cafe Cafe Je T'aime
上水都有得蒲 Cafe，但一入到去 Cafe Je T'aime 就會有種世外桃園感覺：Cafe 位處一條充滿水貨店嘅新功街上，同佢充滿歐陸風格嘅裝潢好格格不入。寧靜嘅 weekdays 下午走進去，放眼室內牆飾都有貓星人圖案，店主想必係貓奴。另外仲有一排書櫃放滿散文小說，愛書人想睇書飲啡都一流。
Cafe 牆上一扇窗畫上望海的貓，店主一定係貓奴，嘿嘿。
熱情果蛋糕（$45）餅底做得 creamy，配上酸味味的熱情果醬，好清新。
Earl grey latte（$47） 飲落有清茶香，又不會掩蓋咖啡及奶香，是店中熱門飲品。
來自伊索比亞水洗豆的「耶加雪夫」（$60），有濃濃花香與果香，飲落好順滑。
Cafe 地方骨子，地下有 4、5 張，還有樓上雅座。
牆上又出現貓星人，貓奴一定好有親切感。
新功街水貨店雲集，Cafe 的出配尤如一道清泉。
Cafe Je T'aime
地址：上水新功街 7 號地下
電話：9703 8167
營業時間：星期一至二、四至日 11am-11pm（星期三休息）
50 年無名街坊涼茶舖
那些年上水人要去戲院睇戲，就一定去行樂戲院，而戲院門前有一檔涼茶檔叫「張秋記」，雖然戲院已結業多年，但涼茶檔第二代檔主張女士依然賣緊涼茶，繼承父業選擇一間冰室門口位置開涼茶舖，仲係賣緊 $9 杯廿四味、祛濕茶及菊花茶，啖啖都係人情味。
無名涼茶舖，只賣 3 種涼茶：廿四味、祛濕茶及菊花茶，$9 杯。
菊花茶味濃又不過甜，好有阿媽涼茶 feel。
涼茶檔租咗樂樂冰室門口旁邊一處作為舖頭，張女士話媽媽主張唔改名，搬到此處就一直無店名。
地址：上水新祥街 23 號
電話：從缺
營業時間：9am-8pm
文：Celia、攝：Kee Yau
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
