尖沙咀舊商住大廈多的是，除咗重慶大廈，仲有美麗都大廈。喺呢度，除咗遊客熱搶嘅熊仔曲奇同空氣瀰漫住的陣陣印度氣息，最近就發現大廈一樓開了間台灣伴手禮專門店，唔止港人熟悉嘅伴手禮品牌「維格」價錢比市面平足 3 成，連香港少見嘅聖保羅 Q 餅同江記華隆肉乾呢度都可搵到，老闆李先生仲獨家引入埋「名阪奇」同」陳允寶泉」兩個當地著名老字號嘅產品來港㖭。
小店就在大廈一樓，裝潢簡單企理，中間有個小小的試食區，大家可試啱先買。
名阪奇果仁塔 $130/ 盒
紅遍網絡的團購美食，而家在這店都買到！一盒十個，撻皮上堆滿大大粒烤得香脆的夏威夷果仁及少量紅莓乾點綴，每粒果仁都黏滿牛奶糖漿，香甜不黏牙。老闆表示試過一星期賣 150 盒！
陳允寶泉寒天夏威夷豆牛奶軟糖 $120/ 盒
百年老號出品，一盒十粒獨立包裝，好骨子。軟糖大大粒，用忌廉、夏威夷果仁及海藻糖等製成，口感煙韌，味道香而不死甜。
原來老闆李先生本身係一個從事建材物流的生意人，工作需要加上本身好客，不時都會買大量伴手禮送畀客人，其中「名坂奇」嘅果仁塔就係佢心水之一。佢發現香港買不到呢款產品，想更多香港人都食到呢種美味，同時覺得台灣手信在香港有 market，乾脆開店公諸同好；開店前仲特登飛咗轉台灣，試食唔同的伴手禮，物色咗 5 個品牌、共十幾款產品，放在舖頭賣，價錢仲只係比在台灣買 mark up 咗少少，以後就算 stay 喺香港都可以食到又特別又地道的台灣伴手禮喇。
聖保羅 Q 餅 $100/ 盒
外層是酥皮，裏面有滿滿的肉鬆、鹹蛋黃、麻糬及紅豆蓉，又鹹又甜，口感與味道都非常獨特，輕輕烤熱食會更好味！另有素食人士都啱食的松子 Q 餅，香港好少見。
江記華隆豬肉紙 $110/ 包
店子有賣香港較少見到的江記華隆豬肉紙，有原味同黑椒兩款，食落富嚼勁，肉味香濃。
香港人見慣見熟的維格產品呢度都有 6、7 款，好似土鳳梨酥、香蕉酥、芋泥酥、鴛鴦綠豆糕、南棗合桃酥甚至爆谷都有，由於李老闆大量入貨又打算薄利多銷，所以價錢仲比坊間平約 3 成！好抵！
壹號手信
地址：尖沙咀美麗都大廈 1 樓 67 號舖
電話：3791 2861
營業時間：9am-7pm
文：Amy、攝：Lok
歡迎你 like 我哋 U Food Facebook Page / U Food Instagram ，取得我哋更新更快嘅資訊！
