星級食家：milkdragon
食家簡介：我是披著狼皮的羊！我會寫好個食評！
期待已久的bonus終於到手，雖然不多，但付出的絕對不少，一班同事齊齊決定去食餐好食餐勁，美其名是慰勞自己，說穿了是為食吧了。其中一人是邊爐怪，我提議去東來居，因為之前睇過雜誌報導確實吸引，少年食神Michael久聞大名，連葉sir在頭條日報也在推介，就去試試吧。
book左7點，呢度好處係無限時間，高檔地方嘛。早book的食客有房坐，房環境不錯，值得讚係唔似得大部份酒樓咁，坐房會叫天不應，呢度長期有人服侍，抵讚。
前菜是枝豆跟醃蘿蔔青瓜，我兩樣都無試。先點湯底，早已做功課，叫了羅宋牛膝＆瑤柱冬瓜，先嚐一口無污染湯底，果真不錯，瑤柱冬瓜可跟人家的老火湯媲美，但羅宋牛膝更是出色，蕃茄味濃也有牛味。
混醬有十二種之多，總會合你心水。我雖有混醬，但最後都無點無用，原因是那湯底實在出色，材料唔點豉油仲好味，我也是第一次打邊爐無食混醬，當真混帳。
值得一提是侍應加湯好頻密，而且真是加湯不是加水，仲會不時幫你用殼仔畢走上面的泡，所以去到最後淡湯仲好甜，再另加所有配料精華，正。
打邊爐前先黎一客炸牛腩為肚皮墊墊底，炸漿既薄且脆，咬下去牛腩微暖，牛腩腍身鬆化夠牛味，如無必要還是不點醬好，原汁原味已經夠殺，如非留肚邊爐定必encore。
前菜尚有炸魚皮＆日本黑豆腐，黑豆腐以冰鎮，豆味不錯，作為前菜合格。炸魚皮是正常貨色，反而放湯後沒那麼好吃。
火鍋配料都是新鮮靚貨，先來一碟本地手切肥牛，肥牛切得薄，有牛味之餘也不鞋，入口仲嫩。鮮鵝腸看起來很肥，但滾熟了之後一點都不覺，吃起上來更比平時食到的爽脆。
牛胸油是此行另一目標，名字聽起來像肥油脂，但實際是牛其中一塊纖維組織，在肋骨與牛肚之間，吃起上來是"索索"聲的爽口，有牛味也有油香味，有人話似西冷肥邊位的油香，我覺得不似，但其實也是不錯的。
另外點了一碟豬肉，應是肉眼根，因為不是我點的。不用滾很久，已然夠豬香彈牙，當然如果怕豬肉有蟲而滾耐一點也沒問題，一樣好味。
鮮蝦滑和鮮丸類都不錯，叫了一客細的鮮丸類拼盤，鮮蝦丸、墨魚丸、鯪魚球、鮮牛丸、鮮豬肉丸五款各兩粒。先講鮮蝦滑，侍應見我地放左係度無動手，好好咁幫我地整埋入鍋，蝦滑睇樣已經見到真材實料，熟左更加係彈牙+啖啖肉。不過之後有幸食左一粒鮮蝦丸，感覺鮮蝦丸更好味更彈牙，可能因為大粒ｄ中間唔會過熟。丸類還試了墨魚丸，同樣地鮮味彈牙，怪不得飯友們都是推介此兩種丸。同事話鯪魚球都不錯，但鮮牛丸和鮮豬肉丸則沒甚麼特別。
九層塔蚵仔餃是另一店子特色菜，九層塔的味不是人人受得，如果你以為呢度會好似煮羊架咁特登煮ｄ唔羶既羊你就錯了，九層塔味道一咬開餃子即散發開來，幸好味道配合得好，肉味餃味在口裡還是吃得出來，不怕九層塔味的，必試！
三秒腐皮是用Citibank信用咭優惠送的，其實三秒與否真是見仁見智，如果湯滾又把腐皮放在最底，則三秒太久了，所以浸幾耐真係睇下你想點食，但有一點是一定對的，就是點都唔好多過三秒，因為呢度既三秒腐皮唔似小肥牛咁咁大條，的的骰骰的她，浸太耐可說是必腍。而且呢度既湯夠杰，三秒腐皮可以吸到足夠的湯，正。
鮮腐竹最好用兜，因為實在太易散開了。黑柏葉雖爽，但我嫌硬過頭，有點超越「爽」了。
稻庭烏冬配一個淥麵的兜，防止烏冬夾唔番，烏冬不用滾太久，吃起上來滑，不錯。食完返黎先醒起少年食神另一名物無鹼水蝦子麵，可惜，下次再試吧。
飲品的菊花蜜很解渴，最神奇是真的有菊花，一壺六位每人一杯也沒問題。
收筷之時正好試一啖打邊爐的精華 - 湯底，因為不停加湯不加水，蕃薯味依舊，更多了其他配料的鮮味，之前的湯底好味，現在的湯底更好味。
女士最開心的是甜品時間，少年食神果真了解客人需要，打邊爐竟然有心太軟食，而且仲要係勁流心。每個心太軟配一球雪糕，我地分別叫左三客所以可以試到黑芝麻、柚子、朱古力三種。柚子是雪芭，酸酸甜甜。黑芝麻是正常，黑芝麻可以重一點。朱古力應該是最好，朱古力味道不錯，可能是最配合心太軟的雪糕。心太軟真正皮脆內流又滿瀉，內裡的朱古力味很濃，暖暖的，真想再來一客，哈哈。
對於今餐，無論食物環境服務都很滿意，就只是價錢未能滿分。今次吃的配料都不是甚麼珍饈百味，但平凡裡見真章才是真功夫。其實我一向覺得任食火鍋有點苦了自己的肚皮，自己點菜的火鍋雖然貴點，但只要有質素我絕對願意付出。友人話今餐係打咁耐邊爐最好的一次，我也覺得是前無古人，但是否後無來者則需要時間去證實。
祝東來居，紫氣東來，食客也東來。
推介菜式：羅宋牛膝湯底、炸牛腩、本地手切肥牛、牛胸油、鮮蝦丸、墨魚丸、九層塔蚵仔餃、三秒腐皮、心太軟
用餐日期：2010年08月06日
特別日子：生日
食家評分：
味道*****
服務*****
環境*****
價錢***
東來居
地址：灣仔謝斐道303號王子酒店1樓
電話：2244-3355
