「立體拉花」咖啡，個個爭住轉載，而家唔使隔住個網，香港都有得飲，再深入點仲可以學埋自己拉，新事仲有 Cafe 你自己操控專業級咖啡機、澳洲冠軍咖啡店同拉花王開店，咁多新嘢，我怕啡友們一時間消化唔嚟。
講到最火紅火熱，莫過於這些睇得又飲得的立體花飾咖啡！平日在網上睇相已經睇到心郁郁，原來本地都有咖啡師玩呢味，仲要全港只此一家，認真巴閉。品牌上年才登陸香港，主打德國咖啡，年初咖啡師 Leo 和 Jason 將立體拉花當興趣玩吓，點知啡迷試過之後引起極大迥響，一傳十、十傳百，如今無論少年、中年人、外國人都被呢幾杯 Kawaii 的咖啡吸引嚟幫襯。
最初他們拉大路的小貓圖案，慢慢增加難度，改變泡沫形態及外表，現在做河馬、烏龜等對二人來說易如反掌，女士們最愛的「鬆馳熊」版本更在努力研究中。立體拉花，一字寄之曰：「熟」，要不斷練習，皆因咖啡的承托力和奶泡的綿密度是關鍵，兩者結合才可以令花飾耐看。想一親貓貓同狗狗香澤的朋友，可以選擇 Cappuccino 或 Mochaccino，最難得是不會另外收費。但畢竟製作立體拉花咖啡會用多 1 - 2 倍時間，建議不妨在非繁忙時間前來，他們會盡量滿足大家對圖案的要求和 order 數量，話唔定仲可以為你 tailor made 獨一無二的立體造型！
Allegretto
地址：尖沙咀廣東道 33 號中港城第三座平台 1A 號鋪
電話：2736 0868
潮物親手試 抵玩拉花班
莫講話立體拉花，即使是平面花飾一樣易學難精，單靠睇書、睇 Youtube 始終不能學足全套，高人教路更有成效。那麼這興趣班就啱哂你了，工作坊會深入淺出，教非專業的咖啡迷學習簡單的 Latte art 技術，還包括近期 hit 到爆的立體拉花技巧，練多幾次保證出得廳堂！
Accino Coffee 的導師 Joseph 亦在本地咖啡界甚有名氣，經常主持公開講座。見近期吹起立體拉花風氣，便索性帶頭做起，加開這個適合任何人士的入門級咖啡班。工作坊主要分「理論講解」和「即場實踐」兩部分，前者讓學員了解拉花所需的設備、搖壺構圖的秘訣等，Joseph 亦會親身示範。有了大概印象後，就是即場實踐，當然是先學較容易上手的平面拉花，小記現在才知道，平面拉花最慢要在 7 秒內完成，面對多線條的葉型圖案，慢手慢腳的話，花紋唔靚之餘仲會圖案仲會沉底消失，一啲都唔易；到立體拉花部分，你會發現更講求速度，因為奶泡倒入咖啡後，更快倒塌，導師會一一指導。親身體驗過，課堂時間充足，2.5 小時內能領會到大部分技巧，快手的話仲可以學埋其他進階版圖案。
Accino Coffee
地址：觀塘道 316-318 號志聯工廠大廈 6 樓 B 室
電話：2606 6383
專業咖啡機 $50Test Drive
一向都覺得愉景灣有種「與世隔絕」的清幽，就像去了外國渡假，而家啡迷更多個理由搭船過來，因為最近這裏開了間咖啡機 showroom，唔使再被動，可以親手操控價值 20 萬嘅 Slayer 專業咖啡機，屋企部一萬幾千的咖啡機點，猶如思域鬥 Bentley，而且 test drive 不過是一杯連鎖店的咖啡價錢，路程遠少少都值得。
日籍老闆 Kenneth。家族經營咖啡機器，他銳意開拓亞洲咖啡業務，場內的 Bentley 級數機器包括：日本 Tornade King 自動式烘焙機、西雅圖 Slayer 咖啡機，都是旗下代理的名廠產品，一部起碼要 20 萬。就算入門的咖啡同好者未有需要一下子買專業機，付 50 元 就可親手感受用專業咖啡機的手感。在店主的指導下畀你親手操控磨豆機和試沖，沖完又可以自己飲番。另外，這裏還有一部 40 萬的全自動咖啡烘焙機，5 分鐘就可炒好咖啡豆，飲杯咖啡包豆就炒好，夠晒新鮮好味，難怪開業不久己有不少中外國咖啡迷來聚腳講咖啡經。
機器以外，咖啡豆都是這裏的亮點，老闆甚至在夏威夷擁有咖啡豆農場 Kona Arabica Farm，專門出產日本人玩得出神入化的 Kona 咖啡豆，此豆風味同藍山相似，苦味低、帶果酸香有果仁香，好易接受，小店用回農場出產的咖啡豆來烘焙，咖啡豆 9 月播種， 2 月收成，富 Citius 香氣，必試。
% Arabica
地址：愉景灣愉景北商場 G08 舖
電話：2885 1312
超靚Latte Art
立體拉花是新興玩意，傳統的 Latte art 仍然有大量捧場客。想在香港飲到一杯超靚的拉花咖啡，就要來找這個猛人── Kim。入行短短 3 年時間，不但贏得香港咖啡大賽的拉花冠軍，更衝出香港，在紐約的世界拉花大賽打低唔少老外，成為首位華人冠軍。早前跟上環 Coco Espresso 的老闆合作開分店，杯拉花咖啡自然是賣點。
拉花你估咁易？咖啡師要打出綿滑的奶泡、加上熟成度剛好的咖啡豆、搖壺的手勢，三者結合才有杯靚靚拉花咖啡，拉花靠 Kim；講靚豆，就有台灣第一屆炒豆冠軍蔣懷德先生幫手揀豆兼烘焙，曾推出 50 款豆，當中不乏 COE (Cup of Excellence) 及 90+ (90 分上)的靚豆，必試自家烘焙、帶甘香帶酸的 house blend「Yellow Bird」！也預備了不同沖法，單是凍咖啡就有冰滴、Ice drip 同 Ice Espresso Latte 三種沖法，沖法多樣，日日嚟都有新嘢試。
Coco Espresso
地址 :灣仔晏頓街 2 號地舖
電話：2529 1682
