上樓京菜DNA變換

老闆在鰂魚涌開有間家庭京菜「匯泉居」，今次開新店大玩 DNA 變種。像左邊哪棵拔絲樹，唔用香蕉，破格地用榴槤，仲有番薯、芋頭及菠蘿版本，絲絲幼細配搭榴槤，比一般拔絲香蕉更綿糯香濃。傳統大菜窩燒圓蹄加入了東南亞元素，用窩燒汁代替傳統的滷水汁，還加入了香茅、青檸汁等，粉炸至脆身，多了種泰式的酸香醒胃。

連南方盛產的海鮮等都拿來做京菜，點題作「一登龍門」，以京式麵豉醬爆炒波士頓龍蝦；另外有用上玫瑰露及花雕做「醉香鮑魚」。試啱口味，仲可以試埋「京式 Omakase」，由店方發辦的私房菜，才 $200 位起，私房菜來說相當有吸引力。

一登龍門
地址：銅鑼灣登龍街 28 號永光中心 3 樓
電話：2893 1921

小籠包WONDER SHOW

小籠包係最受歡迎的上海菜式，翡翠拉麵小籠包新出了八彩的小籠包，變異成黑松露、蔬菜、鵝肝等版本，甚至將名菜口水雞、麻辣牛肉都塞埋入去做餡！仲有舖頭玩埋魔法變大，將小籠包放大 3 倍，滋味 Triple Up！

八彩 Xiao Long Bao

翡翠拉麵小籠包新作「八式小籠包」，由新加坡總部研發 3 年而成，去年在當地首度現身，即成話題作。今年香港都有得食，但只在荃灣店供應。

每客 8 隻小籠包，包括原味、鮮蝦、黑松露鮮肉、鵝肝鮮肉、芝士鮮肉、麻辣牛肉、蔬菜鮮肉及口水雞，配埋繽紛外表，睇見就想食。師傅話新味小籠包，製作方法同普通版差不多，即叫即做。鮮味源頭梗係湯汁，用老雞豬骨豬肉金華火腿等熬足 12 小時而成，味道超濃郁。每隻約重 30 - 32 克，一樣要皮薄餡靚，裏頭用脢頭豬肉、牛柳頭、蔬菜及雞肉等，上等材料味道自然好。

俾個小貼士大家，進食次序應好似食壽司咁，由淡味的蔬菜、原味開始，再而吃重味的口水雞、麻辣牛肉等。

翡翠拉麵小籠包
地址：荃灣大壩街 4 - 30 號荃灣廣場 3 樓 337 號舖
電話：2363 8698

(原文摘自《U Magazine》文：Pam、圖：Ken、Jay)