台式火鍋今年真威威，不斷有新舖出現，這間最新成員唔單止做台式手工火鍋，仲以套餐形式供應，一個價食晒圖中（鳥結糖除外）所有嘢，呢樣都未算最抵，益食家位仲有包埋鍋底，唔係一款，而係 2 款湯再加中間的火焰清酒蜆螺，火鍋精見到即時戀愛了。
湯底以台式養生鍋為主，鴛鴦鍋可自選 2 款。一紅一白是經典配搭，紅湯梗係麻辣鍋，加咗四川青花椒煮，辣度有、麻度都有，記者食咗 10 分鐘，嘴仔 keep 住麻痺；白湯先精彩，圖中的是「東方美人鍋」，以竹絲雞加上大熱的桃膠煮，啖湯甜但又唔會重口味，好多膠質，食咗會變美人。其他白湯仲有人蔘藥膳、山藥牛乳、酸菜白肉等。
配料台味也濃爆了，有台式火鍋大熱的三色墨魚磚、蝦雪條、太極墨魚軍艦、墨魚鳥結糖，仲有店方用美國安格牛打成的牛丸及牛肝菌黑松露餃，全部 homemade，每樣一件都吔飽你，人均計，性價比有 4 粒星。
焱選套餐 $268 位（兩位起）
套餐已包括前菜、火焰清酒煮蜆螺及 2 款自選湯底，圖中為養生人蔘藥膳鍋及青花麻辣、海鮮拼盤、肉類、手工火鍋拼盤、響鈴、蔬菜籃、飲品及甜品，醬料費亦包在內了，性價比都幾高。
精選肉類（每兩位選一份）
這款是日本松阪黑豚肉，肉鮮甜帶油香，所以配上青瓜片畀你夾着吃解膩。
太極蟹籽海鮮軍艦（手工拼盤之一）
豆卜上加了原味及混入墨汁的墨魚膠扮軍艦壽司，這款打得鬆化，墨魚膠分量超多，豆卜吸晒湯汁。
精選肉類（每兩位選一份）
此款為頂級安格斯牛頸脊，prime 級美國牛係唔同啲，油花夠白夠細緻，腍滑牛味重。
三層樓墨魚磚（手工拼盤之一）
顏色是加了菠菜及南瓜而來，以墨魚膠手打造成，這款口感爽彈。
別蝦我（手工拼盤之一）
以海蝦打成蝦肉雪條棒，裏面更加了 wasabi，蝦肉厚，吃一支勁飽，仲帶少少芥末刺激感。
手工火鍋拼盤
除了海鮮軍艦及三色墨魚磚外，還有牛肝菌黑松露餃及手打安格斯香辣牛丸。
黑白墨魚鳥結糖 單點 $88
手製的墨魚鳥結糖，白是原味，黑色則加了墨汁，兩款裏面都加了墨魚粒。
即炸響鈴卷
體積超巨大，這款是 4 人份，長度差不多到鍋底一樣。
時令海鮮拼盤
會供應 5 款海鮮，近期有龍躉片、帶子、鮮海蝦、蟶子皇、鑽石蜆、刀貝、花甲王、脆鯇片或東風螺等。
飲品及甜品
套餐已包了，均是 homemade 的，這款分別是紫貝天葵及木糖布甸。
焱手工涮涮鍋
地址：旺角彌敦道 558-560 號譽發廣場 3 樓
電話：2918 1388、6160 3288（Whatsapp）
營業時間：11am - 3pm、6pm - 2:30am
收費：現金及信用卡，設加一
交通：油麻地站 A2 出口，步行 1 分鐘
泊車：窩打老道設咪錶位
平均消費：$280
備註：1. 圖中全為 4 人份量。
2. 圖中的火鍋料及湯底都設單點。
原文刊載自U Magazine
