早前Hit爆紅磡的北京煎餅，最近港島天后都食到！新開的煎餅店—老COME煎餅，主打8款口味煎餅，全部即叫即製，足料大大份，吸引不少學生lunch time來捧場。
煎餅用綠豆麵漿，加上雞蛋及芝麻，再配上不同餡料及醬汁，於大鐵板上煎到香噴噴，再捲起，賣相與手抓餅相似，質地煙韌較薄及濕潤，少了手抓餅的酥脆。
煎餅分別有原味、北京烤鴨、上海、叉燒、雙蛋火腿芝士及紫薯甜煎餅味，價格由$20至$38起。
必食有北京烤鴨味($38)，煎餅塗滿北京填鴨醬，再重力加上爆棚的鴨肉絲、青瓜絲、莞茜、京蔥等，最後加上炸薄脆，咬落脆卜卜，增加口感。烤鴨肉味香濃，配上甜香填鴨醬，加上脆口清新的青瓜，平衡肉味不太膩。另可加$10變成升級份量，所有餡料都double上，切開成2吋厚，與朋友share剛剛好。
喜歡香辣口味的朋友，可選日式沙律雞煎餅($29)，餅皮包着雞肉、京蔥、薄脆，再塗上芝麻及自家製炒辣醬，味道惹味微辣。
另有甜食的港式甜煎餅($20)，煎餅用了紫米麵粉製成，唧上花生醬及煉奶，配上炸薄脆。味道如港式格仔餅，但口感煙韌，食落較輕盈不飽滯，當下午茶甜品不錯！
文：HK港生活
