深水埗 42 年老餅家均香的招牌角仔由 1983 年起紅到而家，一提起均香就諗起餅家的角仔！角仔每日新鮮即製，件件金黃飽滿、超鬆化，新年前可以日賣 300 磅！
text│Sakura photo│Kei
「坊間大部分角仔都只會用水皮製作，我哋想更加鬆化，特別加入油皮摺成酥皮，好似做牛角包的原理，層次同酥化度更高。」江仔說。製作酥皮的材料很簡單，只需低筋麵粉、日本砂糖和油，但麵粉和油的比例要精準掌握，江仔都跟爸爸學了很久才掌握得到精髓，摺疊 6 至 9 層口感最為鬆化。
講到製餡及包餡，就輪到吳太出手，她 1983 年開始負責這環節，無人比她更精於此道。「花生我哋自己焗香再磨，我唔鍾意現成貨有油溢味，所以幾忙都要自己製。」吳太說。花生餡選用有衣珠豆花生，別看它比較細粒、但其實比大花生更脆，每日新鮮焗香後再去衣，磨成幼粒後加入砂糖、芝麻混合成花生餡，個個街坊食過都話花生味勁香。
要做出隻隻脹卜卜、飽滿似元寶的角仔，原來難度甚高。「包餡喺最難，皮薄就好易爆開、包得太大隻，口感又唔得！呢度啲伙記做足幾廿年，先咁熟手！」兩母子異口同聲地說。
要做到皮薄餡多，角仔收口的技術好重要，看見吳太輕輕鬆鬆把角仔皮對摺後壓實，再向內摺出花邊，約十秒就包好一隻皮與餡比例是 1:1 的完美角仔，動作瀟洒，當然不是人人做得到，42 年累積下來的功夫確實不同。
看見角仔在金黃的新鮮芥花籽油裏翻滾，師傅們不時人手「拋鑊」，確保角仔無黏在一起，隻隻也炸得均勻，15 分鐘由生麵糰變成金元寶的炸作過程，看得很治愈！拿一隻放涼了一回、還有溫度的角仔放入口，又脆又鬆，最緊要無油膉味。「我哋絕不用隔夜油㗎，啲油夠香，先有這種效果。」江仔補充說。
作為年輕一輩的江仔，不時也會研發新口味，好似榛子朱古力、芝士肉鬆等，希望吸引年輕人幫襯，擺脫角仔就是老土的形象。
【info】
均香餅家
地址：深水埗北河街 203 號地鋪
電話：2777 0719
營業時間：6:30am - 12mn
店主 江仔、吳太（右）
均香餅家早前因為加租而結業，最近在原址旁重開，江仔和媽媽都衷心感謝街坊的
支持，他們說要繼續做好本份，製作出色的傳統餅食。
均香的角仔紅遍深水埗，單是外形已相當有說服力，隻隻炸好如金元寶，外皮乾
爽，最勁係看得出鬆化，行過不妨買返磅，寓意家肥屋潤、年頭旺到年尾！
搣開會發現均香角仔的皮跟坊間的大不同，這圖便清楚看到它一層層的結構，而且非常薄，香脆可口，餡料也不是打到糊成一團的，豐富足料，見到粒粒珠豆花生粒，餡料味道香甜，花生和芝麻味香，砂糖部分黏軟。
傳統花生角仔 $120 磅（新年期間 $140 磅）
角仔每天製作，日日清，包包新鮮。提提大家過年前經常早早售罄，不妨早點來入貨。
