如果係沙牛麵 fans，一定聽過元朗的永順，這間 35 年的舖頭裝修重開，一改以往傳統茶水檔的格局，變成光猛的型格快餐店，餐單不變，馳名沙嗲牛、奶茶、炸豬扒、雜錦麵一樣喺度，環境升級、但味道與情懷不變，幫襯嘅人潮好似仲多過以前。
text│sieg photo│Jay
永順 1986 年才搬入元朗，最初以茶水檔形式經營服務附近的工廠職員，只賣簡單的三文治與奶茶，直到 96、97 年才推出沙牛麵，老闆陳生是潮州人，潮州人最叻做沙嗲，濃郁、充滿花生香，又有沙茶醬的惹味，誰知推出不久便得到食家青睞，近 30 年來食大三代街坊，更有不少區外人慕名而來。
永順的沙嗲做得有誠意，日日煮，不隔夜，日日炒足十幾鑊、賣近 300 多碗。沙嗲膽不用現成貨，用 6、7 種料頭、花生醬、沙茶醬等 3 種醬料炒成，沙嗲不死鹹、微稠帶花生香，非常惹味。牛肉不用急凍貨，原條鮮牛肉入貨，再去筋切片，既因為是鮮牛、也因為去了筋，完全不須用食粉或梳打「乸」過，也腍滑有牛味。誠意位仲有鮮牛放到沙嗲牛中炒，將沙嗲香逼到肉裏，啖啖都是沙嗲香。
來這裏吃沙牛麵，識食嘅一定點蟹王麵，亦因為永順的沙牛麵太紅，蟹王麵亦因此而聲名大噪，4、5 年前被雜誌報導後，連連鎖超市也將蟹王麵上架，最終全港都識。蟹王麵是香港第一代引入的日本即食麵，最初只在元朗一些士多、雜貨店販賣，沙牛配元朗獨有的蟹王麵亦成了永順沙牛的一大特色。有別出前一丁，麵質軟一點、滑一點，夾一箸掛上沙嗲牛，掛汁好味。
沙牛以外，炸豬扒也有無數 fans，沒有花巧，肯花時間上鬆化的脆漿生炸，巴西豬扒用刀背揼揼鬆，即叫即生炸，上枱切忌即刻放入口，熱氣騰騰會熨到朱唇㗎！奶茶也是元朗街坊必點，混合了 3 種粗幼茶葉，茶味濃重、茶底滑溜，茶多奶少，一飲醒神。
永順仍保留茶檔模式，6:30am 開招呼一班愛歎奶茶的長輩，每日 5:30pm 打烊，記得唔好咁晏嚟，記者試過 5 點前來，沙牛賣晒，幾失望呀！
沙嗲牛肉 $21、蟹王麵 $11（兩餸起）
沙嗲牛用來鮮牛做，會放到沙嗲汁中炒，連牛肉都滲花生香味，沙嗲汁微稠，上枱即傳來花生香味，入口有少少甜、又有沙茶醬的惹味。
熟食嘅，梗係配永順煲紅嘅蟹王麵，其麵質較軟帶滑，澱粉味適中，掛上沙嗲汁，沙嗲味更顯香濃。
熟客鍾意叫炒牛肉做麵料，鮮牛即叫即炒，令牛肉多了份焦脆。
沙嗲炒牛肉麵（炒牛肉 $24、福麵 $7，兩餸起）
沙牛麵的另一種食法，就是點炒牛肉再配沙嗲汁，熟客才識點，咁叫勝在牛肉口感特別好，牛肉焦脆有嚼感，多了份鑊氣。
炒牛肉帶焦香，特別香口。
雜錦麵（雪菜肉絲 $15、雜錦 $15 麵底 $7）
其中一款元朗街坊食到大的麵食，材料豐富，有切得粗粗的午餐肉、魚片及紅腸，材料非白烚、全部爆香奉客，配個福麵，深受街坊歡迎。
芝士流心蛋炸豬扒三文治 $29
永順名物之一，豬扒即叫即炸，還有流心的雞蛋及芝士，豬扒入味易咬。
茶記重裝後格局年輕光猛，座位多了，但不覺迫夾。
【info】
永順沙嗲牛肉專門店
地址：元朗元朗安寧路 2 號冠煌樓地下 F 號舖
電話：2474 7074
營業時間：6:30am - 5:30pm
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
