營養師大廚教路 地中海風芫茜醬

text│Vera　photo│Kee

芫茜控想試啱夏天食的芫茜菜式？不如做款地中海風芫茜醬，清新得來又刺激胃口。今次請來大廚兼營養師 Marco 教路，自製健康有營芫茜醬的秘訣，簡單易做，不諳廚藝的人都可以跟住做 。

美味有營秘訣

新鮮芫茜要乾爽
採用新鮮的生芫茜及羅勒，摘取嫩葉做醬，不要莖，才有清香的效果。如果用乾香草，青醬便不夠香。用水浸洗芫茜、清除根部的泥後，再用廚房紙印乾，芫茜保持乾爽才能做醬，否則芫茜醬會有過多的水份。

羅勒平衡芫茜味
可按個人口味而調配芫茜和羅勒的比例。喜歡茜味，可多放些芫茜，但青醬只用芫茜不加羅勒的話，茜味會太霸道，掩蓋餸菜的本味。最佳的份量是羅勒與芫茜各一半，羅勒清甜的香草氣息可平衡芫茜強烈的氣味。

即做即食最有營
芫茜含豐富鉀質、鐵質和維他命 C ，有助維持心臟血管健康。芫茜醬即打即做菜式，並儘快食用，可保存最佳營養價值。做好的芫茜醬放久了或高溫煮熱，會流失維他命的營養。

配橄欖油夠低卡
芫茜醬低卡路里，追求健康人士宜用橄欖油或菜油打芫茜醬，參考地中海青醬方式，混合松子仁、蒜頭及巴馬臣芝士粉，增強香口層次。

大廚提議配搭
芫茜青醬適合配搭海鮮、雞胸肉、三文魚、白身魚、素菜、pizza 或塗麵包。

盧思偉 Marco Lo
獅城星馬餐廳及西餐廳「角落」創辦人、龍華酒店營運總監、註冊營養師

芫茜青醬燴蜆肉意粉
芫茜青醬靈感源自意式香草青醬 pesto，配海鮮類意粉風味清新，用來配新鮮沙蜆更能突出醬料的清香，啱晒夏天！

↓點擊圖片放大↓

材料（青醬）：
芫茜 40 克
羅勒 40 克
松子仁 20 克
蒜頭 2 粒
橄欖油 / 菜油 3 湯匙
巴馬臣芝士粉 1 茶匙
鹽 1/2 茶匙

↓點擊圖片放大↓

材料（意粉）
蜆 300 克
意粉 50 克

做法

1. 將芫茜和羅勒洗淨，印乾水份，摘取葉子。

2. 把芫茜、羅勒、松子仁、芝士粉、蒜頭、鹽及橄欖油，倒入攪拌機內攪拌至糊狀，打成芫茜醬。

3. 煲滾水，下鹽，烚意粉 8-10 分鐘，撈起瀝乾水份。

4. 把鑊燒熱，下 4 茶匙芫茜醬的油。

5. 下蜆肉略炒，加入兩湯匙水或上湯煮至蜆殼全開口。

6. 然後下意粉，再加入 3 茶匙芫茜醬，燴意粉直至均勻沾上青醬色，熄火上碟。

大廚貼士
1. 因芫茜醬含油份，先爆香少許芫茜醬的油去炒蜆便可，毋須另加油。
2. 做好的芫茜醬若不是即日食用，只要放進製冰模並於雪櫃冰格急凍，能保存醬料的鮮香味。