雖然素食逐漸普及，但素食朋友如果去超市、便利店買嘢食買嘢飲，仍然要小心 check 成分，因為好易中招！來這間位於葵涌、開業不久的「甘薯葉」就無問題，因為這是全港首間素食超市，件件貨都係由老闆 Gordon 親自挑選，信得過！
甘薯葉老闆 Gordon受媽媽影響，十多歲時已食素，至今二十年，屬蛋奶素者。本來Gordon 打理開成衣生意，但他跟媽媽都想推廣素食，便把生意轉營，專心賣素，身兼批發及零售商。這裏規模比起一般超市，當然不算大，但千多呎地方，企理光猛，貨品排得整整齊齊，備有購物籃給大家掃貨，shopping 得好舒服！產品超過四百種，幾乎都是來自台灣及馬來西亞，包括醬料、飲品、零食、冷凍食品、米、麵及營養食品等。
「既然一心推廣素食，當然想做到最好。揀台灣貨、馬來西亞貨，係因為優質。我自己都係用家，唔好唔會賣，敢講呢度有 7 至 8 成貨，都係我親身去過廠房，睇晒生產過程，試食後才入貨。有我哋把關，唔會有黑心素食。」Gordon 說。
這店更自置冷凍車、冷凍倉庫，只供素食專用，全程不會接觸任何肉類，素食朋友可以安心掃貨。開業不久，已有很多素食朋友來幫襯，Gordon 想做到價格普及，門檻低，可讓更多客人買得起，也能吸引非素食者嘗試。日後他們還打算增設網上購物及再開分店，期待店子開枝散葉，令素食者入貨更方便。
Simon 伍成邦
一念素食老闆，曾擔任飲食版記者，現為經常素食者，喜愛清淡味道。由他 comment 一下素食超市的產品及試食最中肯！
「呢度環境唔錯，食物選擇好適合香港家庭，像那些仿葷產品，方便易煮，亦令煮餐素飯也有趣味。舖頭有空間再入多些貨，譬如食物以外的生活用品。如果想做中檔次，可考慮引入外國產品，多元化啲。」
沙茶醬 $17.8
來自台灣，素食者非常熱捧的醬料，拌麵拌飯蘸點食物一流。
輕檸茶 $10.9
以新鮮檸檬汁製造，天然健康，甜度比一般檸茶低四倍，熱量也少了一半，是怕肥者佳音。
煙燻辮子乳酪 $113.4
即係芝士，阿根廷出品，經高溫烹調會變得軟身，Gordon 教路用來炒蛋最正。
丸莊醬油 $47.5
「這醬油不會只得鹹味，反而有種陳釀香味，質感帶點濃稠。」
香菇煮友 $58.9
「食日本蕎麥麵時，可用來代替鰹魚汁，清鮮不過鹹。」
純濃燕麥 $13.5
「燕麥味道濃郁，自然而不會過甜，即開即飲好方便。」
甘薯葉
地址：葵涌大連排道 35 - 41 號金基工業大廈 8 樓
電話：2485 3423
營業時間：星期一至六 9am-7pm，星期日及公眾假期休息
收費：只收現金
備註：凡購物滿 $1,000 或以上，免費送貨。
(原文摘自《U Magazeine》、文：Pam、圖：Ken、Keeyau、Lamlam)
更多素菜素食go green情報 : 素菜 特集
