小儀：西班牙小吃劇場

我從事演藝界工作，小劇場嗰台板我踩唔少啦，勢估唔到我畀一個好另類嘅劇場 KO 咗，講真呢個劇場有演技旁身都無用，反而要靠把口，因為呢個係「Theatre of Tapas」（西班牙小吃劇場），男主角係廚師，我作為第一女主角，唔使唸對白，唔怕食螺絲，只怕你食唔晒唧，呢種劇場真係演員嘅終極夢想。

Theatre of Tapas 呢個概念嚟自呢度的大廚 Pedro，佢好猛料，係西班牙嚟嘅米芝蓮星星級廚師，平時嘅 tapas bar 係你揀，嚟到 Pedro 嘅主場，佢就將日本菜嘅 Omakase 概念用喺西班牙小吃度，呢個小劇場嘅星級男主角會喺佢嘅舞台——開放式廚房，邊煮邊展示廚藝，以西班牙優質食材，如牛扒、鱈魚、紅蝦、八爪魚為一眾喺 chef's table 嘅男配角女配角 tailor made 菜式，呢種概念好得意喎。

呢個劇場分咗 6 節（即係六道菜囉），由前菜到尾聲嘅甜品都好與眾不同，平時啲 tapas 咪好隨意嘅，但係呢度嗰啲仲精緻過 fine dining，先吃清新的前菜、緊接係蔬菜同海鮮，然後是肉類、之後係以海鮮為主題的主菜，再嚟肉類主菜及甜品，當然菜式安排要睇下 Pedro 先生當日拿到乜嘢靚西班牙食材同心情啦，但一定會有驚喜。

呢度仲有個好正嘅酒吧，睇唔睇到嗰罐用茶葉罐載嘅 cocktail，而家西班牙好興咁樣 serve，唔錯㗎。仲要提提大家呢間餐廳好神秘，喺中環雲咸街，但又好鬼神秘，佢喺蘭桂坊酒店樓下，外面有垂直植物牆，眼大嘅話好易睇過櫳，我當日都係因為咁而啲搵唔到，但入到去，雖然好黑，但好華麗好神秘，真係要小心走漏眼。(ENDMARK)

Zafran
地址：中環雲咸街 43-55 號地庫
話：2116 8855
營業時間：星期一至六 12nn-3pm、6pm-深宵，星期日 6pm-深宵
備註：Theatre of Tapas 須早 2 日前預訂，分 $500、$800 及 $1,000 三種價錢

(原文摘自《U Magazine》ISSUE 470、文：小儀、圖：Nova)