當邊爐打得無分季節，唯獨聞到那陣陣焦香、吃著熱騰騰的煲仔飯時，才感到冬天來了！想在家裡來一煲，即使沒有炭火、也欠缺大師傅的手勢，亦可參考以下煲仔飯達人的貼士，煮得有板有眼，上得大枱。
達人 profile
朱汝華，外號「華 Dee」，是專賣煲仔飯的紹華小廚老闆兼大廚，經常創新口味煲仔飯，曾在銅鑼灣煲仔飯名店新翠華工作多年，最高紀錄是一日煮超過 500 個煲仔飯。
第一招：米粒飲飽水
先說最基本材料－－米，華 Dee 說煲仔飯最好煮得粒粒分明，軟熟得來帶點咬口，他說：「除日本米黏度高外，其他米煮出來都差不多，我喜歡用泰國米，因為米粒瘦長，飯味亦好。」
同平日煮飯一樣，先要將米浸水，以清水浸過米粒約 3 厘米，大約浸 1 至 1.5 小時。華 Dee 話浸過水的米，會受熱均勻，即使以前用炭火時火力時猛時弱，亦無問題，更令米飯快點熟。米粒由未浸前的淡黃色，到浸過後變成奶白色就為之 ok，再瀝乾水半小時就煮得。
第二招：生米煮熟靠睇火
將米放進瓦煲，加熱水至浸過米 1 厘米。華 Dee 解釋加熱水可縮短烹調時間，但自家煮的話，可改加凍水。開始時先用大火，將水滾起才可煮熟飯，還同時把瓦煲燒熱，令傳熱、保溫效果更好。
看見米面不停冒出氣泡，便可收慢火，放進材料及蓋上煲蓋，等約三、四分鐘，其間瓦煲會不停冒出蒸汽，至蒸汽差不多消失時，就是時候炮製飯焦。方法是將瓦煲傾側 45 度，分四邊每次煲約 30 秒，飯焦便均勻又香脆。待煲冒出白煙，即代表飯已熟透，熄火焗多一分鐘左右，飯粒收乾水，會更香更乾爽！
第三招：放食材要留「白」
煲仔飯用料多變，簡單如北菇滑雞、臘味、窩蛋牛肉等，諗起就想食！
煮出靚飯，還要處理食材，才雙得益彰。貼士一是減少食材的水份，像洗淨後要瀝乾水才可醃味，又或以鹽代替豉油等；其次是，難熟的肉類如排骨、雞肉要切得細件，方便短時間內煮好；最後，趁米飯收慢火落料時，要將食材平均鋪放飯面，就以北菇滑雞飯為例，難熟的雞件放飯面，切勿疊起，雞件之間要有空位，以看到白飯為準，原因是靠米飯將熱力從煲底傳至煲蓋，如密室般將食材弄熟。易熟的菇片則放在雞件上。
第四招：美味豉油
問到煲仔飯的靈魂係咩？華 Dee 答係豉油：「簡單用豉油、老抽、冰糖及水煮就得啦，老抽會落多少少，先至夠杰身。想豉油鹹啲落少啲水，甜啲就落多啲冰糖，調校分量要視乎個人口味。」此外，還可以在煮豉油時加入臘味粒，增添油香，或加入乾蔥油、蒜油等，更惹味！
煲仔飯三問
Q：甚麼是三及弟飯？
A：即係飯底（火農）、中間飯熟而面層仍然是生！通常是因為浸米時間短，或煮飯時的火力不夠。
Q：用新米或舊米有分別嗎？
新米水份多，平日烹調時會下少啲水，而舊米則較受水，但因無論新/舊米都會先浸水，所以，煮煲仔飯來說分別不大。
Q：點至算好味的煲仔飯？
A：米飯粒粒爽，分得開的，而且聞到香味，仲要有香脆飯焦！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
