好似早排去咗黑布街，無嚟一陣之嘛，點知就突然變咗大鄉里出城呀，除咗拉麵來、Knock Box 同 HeSheEat 之外，多咗好多有型食肆，而我專登嚟試探呢幾枝試管搞乜傢伙。
呢間舖嚟黑布街人氣高企㗎，上 ig 成日見到佢哋啲靚靚甜品，至於最有睇頭，一定係呢套 test tube 啦。喺我學生年代，test tube 就打爛得多，估佢唔發展到可用嚟載住甜品，呢 3 枝嘢，好有驚喜㗎，睇相都睇唔出真相，要嗒真啲先知係乜嘢味，好玩嘢！我以我嘅金舌頭試探過，下圖由右至左分別係：我最冧嘅「伯爵茶意式奶凍配濃咖啡泡泡」、有少少酒意嘅「冧酒青檸慕絲薄荷啫喱 Mojito」同「青瓜山葵沙冰」，一枝嘢都咁多搞作，又枱枱都點咁滯，真係要向廚師哥哥 salute 先得囉。
老闆 Ryan 好後生，原來佢同幾個朋友「仔」夾份開呢間甜品店，佢哋係酒店出身嘅甜品師嚟，個個都係滿腦子鬼主意嘅後生仔，自己生意自己打骰，仲同你老老正正好似以前返工咁咩？梗係玩盡佢啦。Ryan 知我接受能力高，推介我試「黑心太軟」，乜得個名咁邪惡？原來係我聽錯，係「黑胡椒心太軟」先啱，廚師用咗黑胡椒吊起朱古力，食落朱古力味更濃但又有 spice 辛香味，好「打耳」啊！
黑啤都畀佢哋幾個麻甩仔廚師玩埋，不過玩到好鬼細緻變咗 chocolate mousse 唧，佢哋喺朱古力慕絲裏面加咗健力士黑啤，咦！啲 mousse 好似更加滑嘟嘟咗嘅？平時好討厭嗰陣澀味居然消失咗，真係想搵個位投訴佢哋都無，留意埋旁邊好似白朱古力嗰幾條係呍呢嗱吉士片嚟，夾埋食又有另一種感受。
Next Station Dessert
地址：旺角黑布街 13 號地舖
電話：2668 8355
營業時間：3pm - 1am
(原文摘自《U Magazine》ISSUE 496)
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
