它的招牌魷魚、魚肉、豬腸都隨之消失無蹤,教觀塘友欷歔非常。
事情居然有轉機,上月中,一間名為「來多碗」的車仔麵開業,本來不甚起眼,好彩其 facebook user name 旁註明是「金僑小食」班底,即教飢餓多時嘅觀塘嗱喳麵 fans 雙眼發亮。
金僑小食在宜安街少說也有 20 年,與另一老字號康和車仔麵齊名,康和有全觀塘最正嘅辣魚蛋,而金僑則以魷魚豬腸同生菜魚肉稱霸。今次金僑班底出動,令這裏的炒魷魚、滷豬腸同牛腩翻生。炒魷魚超級無敵,以蠔油等炒製,魷魚爽口,中間都入到味;豬腸先正,滷水滲晒入腸裏面,腸皮煙韌好"O趙"唔黐牙,水準直豎姆指;半肥瘦嘅牛腩以柱候醬炆到又軟又腍,入口富油香,單係這 3 種嗱喳餸已搵返當年金僑朕味。
其實佢哋湯底都好甜,湯底以豬骨大地魚等每日熬,飲落有肉的鮮甜而非雞粉水、味精水朕味,唔加辣汁都得㗎。不過一場嚟到,老虎蟹加埋佢哋嘅惹味辣汁,一樣由金僑班底主理,磨豉味香到暈,好惹味;加腩汁都好正,牛腩油香肉香加埋柱候醬香,牛味甚濃,搵得返舊時嗱喳朕味,正啊!
四餸車仔麵 $36
包括招牌菜魷魚、蘿蔔、牛腩及滷豆腐,魷魚爽口入味,牛腩值得讚,肥瘦兼備,炆得夠透夠軟腍,入口有油香,蘿蔔最好味,煮到半透明,無筋無渣又索晒腩汁味道;滷豆腐坊間少見,豉油香滿滿,口感結實。一定要加腩汁及辣汁,柱候醬味道鮮濃,辣汁磨豉香多於辣,加一小匙發揮嗱喳麵神髓。
三餸車仔麵 $30
豬紅、豬皮及豬腸是金僑招牌菜,這裏沿用相同製法,當中以豬腸及豬皮最出色,豬腸煙韌富滷水鹹香,豬皮處理得乾淨又煮得柔軟,入口 feel 到半融膠製。豬紅也不俗,滑滑爽爽,但略嫌實了一點。
來多碗車仔麵
地址:觀塘康寧道 62 號地下
電話:9644 0110
營業時間:11am-12mn
收費:只收現金,不設加一
交通:港鐡觀塘站 A1 出口,步行 8 分鐘
泊車:世達中心 $14/hr
平均消費:$30
相關報導:
牛下牛雜檔 再現江湖
承傳三代 榮耀米芝蓮滷味
歡迎你 like 我哋 U Food Facebook Page / U Food Instagram ,取得我哋更新更快嘅資訊!