遊大澳 8 個飲食 Checkpoints！

大澳 8 個飲食熱點
No.1 文物酒店 High Tea
由前水警總部改建的大澳文物酒店，保留著濃濃的殖民地色彩。酒店內的唯一一間餐廳設計成玻璃屋 feek，裝修貫徹懷舊感。餐廳以大澳特色的 high tea 最出名，部分食物更加好有大澳特色，像用大澳蝦醬醃製的雞翼、加入少少鹹檸檬的餅仔、老店隱菇茶果、大澳餅店的合桃酥、紫貝天葵沖成的特飲等，兩位用才二百多元，幾抵食。人多仲可以叫下新推出小食如焗芝士粟米片，香口得來唔熱氣。順帶一提，酒店依家至 6 月尾推出優惠，住一晚包早餐低至 $1,330，仲可以玩埋整茶果、鹹蛋黃 workshop，打算慢遊大澳的，不妨考慮住一晚。

Tai O Lookout
地址︰石埗街香港大澳文物酒店
電話︰2985 8383

No.2 堅．炭火風味雞蛋仔
唔少人入大澳的指定動作都係食番底炭火雞蛋仔。小區內供應炭火雞蛋仔的當然唔只一家，但要數最好食的首推呢家！呢間店位於小食集中地吉慶街，在沙翁店對面，記得認住黑超叔個嘜頭先係正品！黑超叔做出來的雞蛋仔外層焦香，粒粒好似食蛋糕仔咁軟綿，出面真係食唔到！

大澳炭燒雞蛋仔叔叔
地址︰吉慶街 59 號地下

No. 3 拳頭大鮮炸沙翁
呢家老餅店的沙翁在大澳爆紅！麵團雞蛋特多，每次都係五六個咁現炸，新鮮熱辣，入口又唔會油淋淋，仲有成個拳頭咁大，好食！位置就在雞蛋仔對面，一次過掃埋，好方便！

大澳金門餅店
地址︰吉慶街 66 號

No.4 棚屋精品咖啡
咖啡精想搵個地方坐下，可以到小區的人氣 cafe 蘇廬。店主是原居民，又是設計師，店子好有自己風格。半露天位對住棚屋景，好搶手。主打精品咖啡，有單品有拼配，店主好有自己原則，認為咖啡上已是最 perfect 的味道，因此不會有奶、糖奉上。來到大可點件 cake 配咖啡。

蘇廬
地址︰吉慶街 86 號地下
電話︰9153 7453

No.5 大澳都有貓 cafe
至於貓奴嘛，入到大澳可以拜訪下呢間貓 cafe，貓店員都係老闆娘收養的流浪貓，隻隻有名，佢地不時在店內行來行去，好歡迎客人同佢地玩。食物以輕食為主，亦有貓咪拉花 cappuccino，門外仲有唔少貓樣精品、tee、tote bag 售賣。

貓澳
地址︰吉慶街 67 號地下
電話︰9497 4206

No.6 傳統炸油池
有番咁上下年紀的，都食過呢款炸油池 (即炸蘿蔔餅)，係老香港的街頭小食。這店做得味道好正宗，材料有蘿蔔絲、肉碎等，炸皮唔太厚，蘿蔔絲夠 juicy，味道好傳統。店內仲有另一款香妃卷，做法似整鹹 pancake，即場煎俾你，幾香口惹味。

大澳小食
地址︰吉慶街 70 號

No.7 大過人頭原隻滷墨魚
掃完吉慶街，係時係轉去另一條食街永安街。就在街口處遇上呢檔原隻巨形墨魚，個身大個人頭，把原隻游水墨魚以滷水輕滷，柯打時先件碗上，墨魚肉厚，滷水味唔太濃，都幾鮮味。

復興行
地址︰永安街 4D 舖

No.8 老字號豆花
呢家豆花店，由街邊檔做到入舖，已經係第三代，仲供應唔少豆腐俾區內大小菜館。豆腐花以加拿大無基因改造黃豆炮製，以石磨磨豆，入口幾滑。

車站豆腐花
地址︰永安街 57 號地下
電話︰2985 5318

歡迎你 like 我哋 U Food Facebook Page / U Food Instagram ，取得我哋更新更快嘅資訊！