沙爹牛 x 西多
西多士係隱藏秘密嘅高手！一日唔切開，都唔會知佢個肚收埋啲乜，好古惑！好似呢間係九龍城街市上面嘅「樂園」，就有 3 款有餡西多士，當中有款沙爹牛肉西多士最得意，唔使諗，即試！
沙爹牛肉西多士 $29
將兩款茶記名物溝埋一齊做西多士，實在太有諗頭。西多士唔使等到下午茶時段都有得食，老闆話餐廳一開門，朝早 7:15am 都會整畀客人。不過因為即叫即做，要等 15 分鐘先有得食，繁忙時間仲會暫定供應。西多嚟喇！表面炸到金黃色，色澤均勻唔過火。西多面仲有煉奶及牛油，見到表面微微隆起，好想切開睇吓有幾多牛肉餡。
切開即聞到沙爹牛肉嘅香味，牛肉餡好似好豐富咁。
實情牛肉偏埋喺同一邊，感覺好似好澎湃，但另一邊只得幾片牛肉，希望餐廳會將牛肉鋪得均勻啲，食落啖啖牛先爽嘛！
牛肉先用秘製沙嗲汁醃味，唔會加鬆肉粉，嗒到少少牛肉香。沙爹牛肉為西多士增添一份鹹香，沙嗲好惹味。如果怕太飽滯，就唔好融晒成嚿牛油喇！
樂園
地址：九龍城市政大廈 3 樓 6 號舖
電話：2382 3367
營業時間：星期一至五 7:15am-4pm，星期六 7:15am-2:30pm（星期日休息）
果味西多菠蘿做餡
美心香港地好搞鬼，倒轉維他奶之外仲有一系列升級版西多士，餡料不甘於只係花生醬咁單調，換上紅豆芝麻、菠蘿軟心及香蕉花生醬，睇相款款都好吸引！
菠蘿軟心西多士＄42（配奶茶或咖啡、凍飲加 $4）
西多士一向畀人又油又膩嘅感覺，加咗酸咪咪嘅菠蘿又會點呢？西多士好厚身，金黃色嘅外表，加埋炸到似吉列咁外層，食落脆到𠝹口，太邪惡！
厚 5cm，比一般西多士大概厚一倍有多！菠蘿粒與奶黃混合成餡料，菠蘿酸咪咪又juicy，可以中和到奶黃嘅甜膩感。
加上燒過的菠蘿，感覺更加清新，食完唔滯！
美心香港地
地址：大角咀海泓道１號奧海城三期地下高層 65 號
電話：2758 5228
營業時間：7am-10pm
註：查詢熱綫 2101 1333
Creamy 半融芝士西多
芝士流心乜乜乜，真係有種難以抗拒嘅魔力！元朗一間餐廳好過癮，佢明明係一間韓燒店，但下午茶時段又變成一間茶餐廳！早排行過見到 tea time 有芝士西多士，仲要係流心餡，$25 有熱飲送，即刻勁想試！
西多士即叫即製，落柯打等多陣先有得食。主角嚟喇！西多士厚度適中，唔算勁厚身。表面呈金黃色，睇落好似好脆口咁！仲放咗一大嚿牛油，融咗足足一湯匙咁多，好邪惡呀！
呢件多士嘅重點，係芝士流心餡！切開睇睇，芝士餡唔稱得上係流心，頂多只可以叫做半融。
嚟多個橫切面畀大家睇，中間嘅芝士真係唔流……不過有芝士狂迷已經嗌收貨！
西多士金黃色唔均勻，有少許炸得過火略呈啡色，面層炸得微脆，好在麵包鬆軟搭夠。牛油好香，但因為太大嚿嘅關係，咬落成口油。重點嘅芝士唔太流心、味道唔算濃，味道鹹鹹哋，整體感覺有啲膩滯。食完肯定肥 10 磅！有 quota 先好試！
悟空茶餐廳
地址： 元朗西裕街 6 號金福閣
電話： 2651 8108
營業時間：10am-10pm
註：流心芝士西多士只限下午茶供應
邪惡升級！瀑布流沙餡
有餡西多已經夠晒吸引啦，仲要大玩流心餡，真係想引死人咩！西營盤的周記點心 + 茶餐廳，就係要用流心西多士吸你過去！店內的招牌作奶黃流沙西多士，原來是無心插柳之作！老闆原來是點心師傅，餐廳賣開點心又有流沙奶黃包餡剩，於是試下用兩片麵包夾住嚟炸，炸完切開驚為天人，流心餡般缺堤般湧出嚟！
奶黃流沙西多士 $18
奶黃流沙餡有鹹蛋的鹹香，用文火將多士炸 3 至 5 分鐘，麵包金黃香脆、流沙餡質地勁流，唔使加牛油、糖漿食已經好好食。
香芋流沙西多士 $18
紫色唔係紫薯，但都唔使失望，因為用新鮮芋頭肉加上砂糖、牛油及少許魚膠粉製作的芋泥，芋頭味勁香濃，食落仲無咁滯！
周記點心+茶餐廳
地址：西營盤水街東利大廈地下 1H 號鋪
電話：2559 2389
營業時間：星期二至日 8am-6pm（星期一休息）
文：Jessie 攝：Jessie、Theo、Foggie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
