1. 創意雞髀包
位處聯和墟，店子細小，外觀睇落無乜特別，其實創意在骨子裡。例如粉嶺人一聽就知的「雞髀包」，餐包中間用雞髀取代了腸仔，咬一口食到雞油滲入包內，因雞髀有煎過，肉質仍保持嫩滑，一口雞髀一口包，個配搭好得意。
另外在收銀位見到好似茶樓「馬拉糕」款式的軟蛋糕，第一次見馬拉糕好似西式蛋糕咁 present，食落質感其實似海棉蛋糕，有輕輕的焦糖味，下午茶食件不錯。
雞髀包 ($8.5) 用餐包夾著雞髀，煎過的雞髀肉咬落依然滑，唔嚡口。
收銀機旁有一餅貌似「馬拉糕」($8/件) 的軟蛋糕，咬落似海棉蛋糕，兼有焦糖甜味，軟棉棉幾好食。
協香麵包西餅
地址：粉嶺聯和墟和隆街 24 號地下
電話：2675 6251
營業時間：6:30am-8:30pm
2. 正方形飛碟蛋牛多
「漢興茶檔」是聯和墟好出名的茶檔，其他食店可能 3 點不露，但茶檔就 3 點收檔，要食記得趁早。
呢度最出名的是厚多士「蛋鹹牛肉多士」，不過厚的地方唔係塊多士，而係中間份「蛋牛」！鹹牛肉混蛋煎得香口，好有鹹香之餘仲厚過旁邊 4 塊多士。牛油多士都烘得剛剛好，食一份好滿足！
除了多士，店內最多人食的是雞翼及豬扒麵，小記叫了一份雞翼麵，上餐時分碟上，發覺雞翼炸得香脆又不過燶，難怪成枱都叫雞翼麵。
「蛋鹹牛肉多士」($19) ，成份正方形飛碟咁，愛鹹牛者必試。
鹹牛肉蛋餅好厚身，見到裡面放滿鹹牛肉及煎蛋，咁足料都係 $19 份，抵！
牛油多士都落足牛油，烘底後牛油熱力滲滿多士。
雞翼麵 ($20) 將雞翼及公仔麵分湯上，免浸淋雞翼影響脆口質感。
漢興茶檔
地址：粉嶺聯和墟聯興街 3 號地下 B 舖
電話：2675 5188
營業時間：星期一至五 5am-3pm、星期六及日休息
3. 長龍腸粉店
見到好多人排長龍，原來都係為等買呢間小店的香滑腸粉、燒賣、魚蛋、豬皮。這店供應真正的庶民美食，可以自由配搭 $3 款既小食，小記為咗留肚掃街，就點咗各 $3 腸粉、魚蛋及燒賣，只係 $9 已經可以當一餐，馳名腸粉仲要香軟兼熱辣辣，掃街食一流！
腸粉、魚蛋及燒賣 (各 $3) 組合起來已經幾大份，腸粉夠香滑，而魚蛋雖非真魚肉製魚蛋，但食落有兒時風味，懷舊感加分。
四眼仔腸粉
地址：粉嶺和隆街 40B 號地下
電話：從缺
營業時間：7am-7pm
4. 老字號骨膠原豬手麵
在街外食豬手麵，通常都係南乳豬手，但遠近馳名嘅「群記牛肉圓豬手」就用清湯燉豬手，食落係啖啖骨膠原兼完全無臊味，女士食好滋補！
原來麵店仲有另一款名物「家鄉炸卷」，做法同酒樓牛肉球有點相似，中間係免治牛肉餡外包腐皮，炸得脆口，點喼汁食，好有牛香，但比牛肉球口感結實。想試炸卷記得坐低就好柯打，多人幫襯可能要等上半小時先上枱，要俾少少耐性。
豬手麵 ($34 大碗 / $29 細碗) 見到豬皮通透，食完補充好多骨膠原，咬落肉質軟身又唔臊，大愛！點辣椒油食吊味仲正。
家鄉炸卷 ($30) 其實係香脆版「牛肉球」，外層腐皮香脆配牛肉鹹香，好惹味。
群記已有數十年歷史，店內裝修維持天花板吊扇、紙皮石地板等，好懷舊。
群記牛肉圓豬手
地址：粉嶺聯和墟聯昌街 5 號豐景樓地下
電話：2675 6382
營業時間：11am-5:45pm
5. 大堆頭三色蜜糖厚多士
點解甜品舖會叫「Bittersweet」又甜又苦？係咪食完甜品後要努力減肥好痛苦？入到去先試一杯邪惡「朱古力爆谷沙冰」，成杯濃厚朱古力沙冰之上，放滿香脆焦糖爆谷及忌廉，幾肥都要飲。
店內名物是「三色蜜糖厚多士」，4 種雪糕口味包括士多啤梨、呍呢嗱、朱古力及綠茶味，任揀 3 款。最大亮點係個蜜糖厚多士，鋪滿濃濃蜜糖烘烤，蜜糖香滲透多士，夾埋大堆頭雪糕陣，食完真係大滿足！
朱古力爆谷沙冰 ($42)，朱古力味夠濃，泡谷滿布杯面，好邪惡！
「三色蜜糖厚多士」($58) 勁大堆頭，最啱 2-3 人食。
Bittersweet
地址：粉嶺聯和墟和豐街和豐閣 4 號地下
電話：2602 6711
營業時間：星期一至五 7:30am-8pm、星期六 7:30am-9:30pm、星期日 9:30am-8pm
文：Celia、攝：Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
