台味濃郁 程班長牛肉麵
講台灣牛肉麵，唔提「程班長」又點有說服力呢！30 年前，人稱「程班長」的程致賢憑一碗牛肉麵，在台北饒河街夜市闖出名堂。今日落戶荔枝角一幢工廈內，唔好以為位置隱蔽就無人知！出色的牛肉麵就好似漆黑的螢火蟲咁，點都會有人搵到！唔係誇張，程班長幾乎全日都有人流，lunch time、weekend 仲會排晒長龍！無他的，因為真材實料。
湯底用咗 50 至 60 斤新鮮牛骨，專挑大腿骨熬湯，令湯底有種油亮的色澤，還加入了像八角、花椒等 10 多種材料，每晚最少花 8 小時熬製而成。湯底煲好後，又會加入用薑葱蒜、調味料等炒香的牛腩，再煮個多小時，難怪每啖湯都咁濃厚。
紅燒半筋半肉麵 $52
牛肉麵分紅燒及清燉兩種，又可以選牛肉或半筋半肉，每個麵都是有柯打先煮。呢碗紅燒半筋半肉麵，牛肉湯的色澤好濃，飲落又唔會太鹹，飲到牛肉的香味又有陣陣藥材味。
清燉牛肉麵 $50
清燉的湯底加咗鮮雞熬製，湯底白色，沒有紅燒牛肉湯咁濃味，但卻多咗一種雞的鮮甜味。麵條每天自家製，口感彈牙。
程班長台灣美食
地址：荔枝角長沙灣道 883 號億利工業中心 1 樓 102 室
電話：2576 1199
營業時間：星期一至六 11:30am-9pm（星期日及公眾假期休息）
高雄路邊攤變得獎店 小王牛肉麵
台灣牛肉麵過江龍點止程班長一人？仲有來自高雄嘅小王牛肉麵！小王由路邊攤起家，仲曾於台北國際牛肉麵節奪獎。佢嘅牛肉麵介乎紅燒及清燉之間，湯底是家傳清宮御廚配方製作，以牛肉、牛腩、牛大骨，加入川芎、當歸、桂子、甘草等 10 多種藥材熬一日一夜做膽。因為台灣牛不能進口，香港店改用本地鮮宰黃牛，牛肉先經醃味後放入藥材膽炆煮，入味又軟身。
皇膳芙蓉牛肉麵 $168
每日限量供應 10 碗，因為牛肉麵入面的牛胸骨肉每隻牛不夠一公斤，太矜罕，所以要限量發售！牛胸骨肉油花分布均勻，肉質軟腍，一咬即化。
精裝牛三寶麵 $70
一碗有齊牛肉 、牛肚及牛筋，其中長條形的牛𦟌食落好煙韌，鮮製手工麵條有粗幼選擇，推介又滑又煙韌的粗麵，掛湯能力強，連湯汁一同食，好食！
小王牛肉麵
地址：鑽石山龍蟠街 3 號荷里活廣場 3 樓 373 號舖
電話：2324 6628
營業時間：12nn-10:30pm
加拿大風格牛肉麵 The Grove
食過真正的台灣滋味，想搵點新刺激？加拿大風味的牛肉麵你試過未？位於大圍的小店The Grove，由 Yanki 和 Vien 兩姊妹所開，佢哋之前喺加拿大讀書時，曾在一家好似仙跡岩嘅台式 Café Green Grove 兼職和認識咗老闆 Roy。後來 Roy 準備退休，兩姊妹便提議跟他拜師學做牛肉麵。
阿 Roy 牛肉麵 $58
湯底用大量牛骨先煮約 4 小時，再加番茄、蒜頭、洋葱、花椒、豆瓣醬等 10 多款配料熬兩小時而成，味道既辛香又甜；加上軟腍的牛𦟌與煙韌掛湯的上海麵，絕對是用心製作的味道。
The Grove
地址：大圍下徑口村 30 號地下
電話：5436 3890 / 6051 0105
營業時間：星期一至五 8am-10pm，星期六、日及公眾假期 11am-10pm
宮廷秘方 養珍品牛肉麵
浸過鹹水的牛肉麵唔啱胃口？咁要試試香港本地薑出品。位於北角的養珍品牛肉麵，老闆兼大廚林先生其實都是台灣人，湯底以牛骨、豬骨先熬出味，再加入西安狗頭棗、香葉、桂皮、牛筋等共 20 多種材料熬製而成，好足料！
招牌牛肉麵 $111
過百蚊一碗牛肉麵？試吓味先啦，湯底呈淡褐色，由於是今日煮聽日用的，湯底入口濃稠、醇香。配以煮得柔韌的牛𦟌和 Q 滑帶勁又能掛起湯汁的乾麵條，呢個價錢是值得畀！
養珍品牛肉麵
地址：北角和富道 118 號地舖
電話：3462 2000
營業時間：12:00nn-10pm
懷舊 Feel 十足 1963 木十豆寸
灣仔有間台灣餐廳個名好過癮，「1963 木十豆寸」拍埋一齊就是個「樹」字，既因為餐廳位置建於 1963 年的樓宇入面，也因窗外的大樹而得名。嘩，改個名都好有台灣文青的感覺！餐廳原來是火炭「Foodie」、觀塘人氣台菜「小時光」的姊妹店，搵嚟台灣老闆、台灣廚拍檔，可想而知賣的是地道的台灣菜！
台式紅燒牛肉麵 $68（午市）、$75（晚市）
牛肉麵的靈魂是湯底，用咗牛骨、雞殼、蔬菜等慢燉 6 小時，味道濃香。配以澳洲牛肋條煮及軟滑的上海麵，唔錯。
1963 木十豆寸
地址：灣仔灣仔道 110 號中匯大樓 2 樓
電話：3105 0160
營業時間：12nn-10:30pm (9pm last order)
文：jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
