跟住星星掃街！深水埗 3 大最正小食

最Hit食訊

發佈: 2016.11.14

文:

1　豆味超香豆腐花│公和荳品廠

喺街市裏面嘅「公和荳品廠」去年已經上榜，當時大家都擔心佢會因為星星降臨而面對被收舖 / 加租 / 逼遷等危機；但一年過好，幸好老店安然無恙。呢間「公和」喺 1958 年開業，大吊扇、瓷磚牆，舊式裝修十年如一日，年輕人會去懷舊，遊客又會去感受一下香港庶民風情。 豆腐、豆腐花、豆卜、腐乳……主力做街坊生意；豆品每日新鮮製作，浸豆、磨漿、隔渣、煮漿、再隔渣、撞石膏，人家的豆花一天做 2 轉，佢就多做一轉，食落零舍滑，豆香味特濃，加少許黃糖食，滋味！

米芝蓮推介必食︰ 豆花、煎釀豆腐、無糖豆漿

公和荳品廠

地址：深水埗北河街 118 號地下

電話：2386 6871

營業時間：7am-9pm

【小食特區】 激抵！$5 有料豆腐花

2　滑嘟嘟舊 feel 豬腸粉│合益泰小食

深水埗「合益泰」門口長期都出現人龍，買咩？就係豬腸粉。你可能覺得豬腸粉很普通，但呢度做的，係滿滿懷舊 feel！碟上鋪一張紙，阿姐隨即喺車仔中拿起熱騰騰腸粉，鉸剪快而準地將豬腸粉剪成一段段，再快狠準淋上豉油甜醬麻醬，灑上芝麻、插上竹籤，情景、味道、情懷都停留於昔日。腸粉熱辣辣、滑嘟嘟。原來老闆做開腸粉批發，米漿自己磨，腸粉白滑煙韌，仲有一陣米香，連麻醬、甜醬都自家製，難怪味道特別香。

米芝蓮推介必食 ︰ 豬腸粉、魚蛋、豬皮、蘿蔔

合益泰小食

地址：深水埗桂林街 121 號

電話︰2720 0239

營業時間︰6:30am-8:30pm

【名人掃區】 地膽糖妹帶路掃深水埗心水小食

3　手工 舊式甜品│ 坤記糕品

坤記糕品係區內名店，全店都係賣糕！ 砵仔糕、芝麻糕、馬碲糕、紅豆糕、白糖糕……好多舊式甜糕都搵到。糕品全部自製，而且用料講究；砵仔糕鋪滿紅豆，白糖糕是舊時味道，芝麻糕有好多層，芝麻味超香濃。老闆做糕無論用料和做法都好講究，朝朝將新米、舊米混合成嘅「半新米」磨成粉開漿製糕，同時謝絕添加劑同防腐劑，講求新鮮，入口軟滑不失彈性，好好吃。