窩心漢堡包第一代
屹立天橋旁40多年的「時新」，由起初漢堡扒夾番茄和洋葱，再由老闆鍾生父親改良為將洋葱混入漢堡內，又將青瓜、蔬果等校成秘製沙律醬，目的是令客人食得輕鬆，唔會跌來跌去，這個配方一用就 40 幾年，味道不變。
士多變快餐店
七十年代尾，「時新」轉型來迎合市場，變成快餐店格局，成為第一代港式快餐店雛型。從只賣漢堡包、炸雞髀等小食，變得更多元化供應粉麵飯，吸引就在附近的理工學生。
經過不少中外傳媒報道，時新個名響噹噹，除了街坊更有不少遊客幫襯，鍾生每日閒閒哋做二千個漢堡應市。見客人外賣漢堡包難以保持原狀，便自家設計漢堡包盒，從兩個到四個都有，貫徹紅白主色，像買蛋糕般，對自家漢堡珍而重之。同時為了令時新漢堡包形象更突出，度出一句標語：「喺香港未食過時新漢堡包，點算係食過漢堡包！」強而有力，對出品滿有信心。
時新快餐店
地址：紅磡黃埔街 1A 地下
電話：2362 1279
至正雞髀沙律下午茶
位於元朗安寧路的華盛頓， 1977 年開業至今，早在開業之初，快餐店已大行其道，及至 83 年開始面對麥當勞衝擊，為增強競爭力，故增加廚房部提供多元化食物選擇。華盛頓係靠兩個人撐起的，另一位就是徐生哥哥，細佬負責廚房，哥哥負責收銀，一併打天下。
滷水炸雞髀
老實說，33 年歷史的華盛頓，陳設早已老舊，但食物味道卻絕對有水準，招牌的炸雞髀沙律，徐生仍沿用後生時學快餐的 formula，先以滷水浸熟雞髀，待冷後雞髀入味，一有 order 先炸至薄脆金黃，由於早已浸熟，只要炸兩、三分鐘便可，足可應付繁忙時段的客流。
另外肉醬意粉和粟米白汁亦是華盛頓招牌，特別是肉醬意粉，一盤免治牛加入茄膏、甘筍、洋葱粒、香葉煮香，同時意粉會用生抽、茄汁炒勻入味，「好多客發現意粉有葉覺得奇怪，其實呢啲香葉係用嚟辟牛肉羶味。」師傅補充。而白汁最緊要「麵撈」加奶打得幼滑，還加入甘筍絲、西芹絲、蒜頭、洋葱等，濃稠剛好，撈飯一流。
華盛頓快餐店
地址：元朗安寧路 110 號好景地下 124 號舖
電話：2478 1333 / 2477 7700
屋村窩蛋肉醬飯
位於友愛村商場的「發發」，舖位細細，街坊吃着自己的快餐美食，可能未必係最好食的，卻早已成為一種生活習慣，久不久要回味一下。餐廳的核心地帶當然是快餐唔少得的開放廚房，裏面的可口可樂汽水機仍沿用至今，仲係入汽水糖漿打汽水，雖然大家都知不及罐裝或樽裝汽水般夠氣，就是喝回從前的汽水味道。
十餐八餐都係免牛飯
發發由 85 年開業至今 25 年，老闆關生最鍾意食發發的免治牛飯，這碟招牌免牛飯用上鮮免治牛肉，還有師傅秘製不可告人的香料，撈飯食一流，唔少後生仔鍾意香口啲都愛加隻煎蛋，想免牛滑啲就來隻窩蛋，拌勻來吃，輕易吃掉一大碟飯。快餐店怎少得小食，炸魚柳配曲曲薯條，大大塊魚柳吉列得酥脆香口，還有自家製的雜果沙律，細細份已夠下午茶頂肚了。
發發快餐店
地址：屯門友愛商場 212 號舖
電話：2451 0831
外賣變堂食
「漢都」這個名字，原來已有 37 年歷史，老闆之一陳生憶述，1996 年大哥在荃灣開漢都快餐店，只做外賣，並交由當時只有廿多歲的兩個細佬打理，由起初只做外賣收六點，到現在收九點做埋晚市，以前只是擺張枱方便員工食飯，食客坐坐下一張變四張，結果做埋堂食，主打抵食小菜、街坊生意，吸引附近居住的「無飯家庭」，堅哥直言七成都是熟客，小菜即叫即炒，堅哥和二哥會看街市每日市況而定小菜款式，保證新鮮，還有自家煲例湯，親切無花巧，就成一頓豐富晚餐。三兄弟一家姐夾手夾腳經營漢都，宗旨不離「做好啲嘢畀人，過得自己過得人。」
漢都快餐店
地址：荃灣路德圍 28 號地下（新店 9 月中開業，荃灣鱟地坊 62 號地下，鄰近荃新天地）
電話：2414 2708
(原文摘自《U Magazine》文：飛、圖：林霖、邱鴻基、吳偉業)
