圍村爐灶
來到屏山，祠堂旁滿是鄧氏家族村屋，裏面隱藏了一家百年村屋，大木門、青磚瓦，盡量保留原來模樣，尾隨 William 推大門一看，見到的是個「L」形石枱上有個大大瓷花盥盆，後方是個竹造碗櫃，大大小小的碗櫃內放有多年歷史的手畫花碟，「以前圍村屋係咁㗎，一入門口就係廚房，有無見到個灶君？我哋以前就喺度煮飯。」William 比畫着。細心發現，原來屋邊放有從前遺留下來的米樁石磨，還有多年無用放在樹下的退休磨豆窰，舊味很濃，如迷你博物館般，到底從這裏煮出來的飯菜是甚麼味道？
屏山獨有神仙鴨
貫徹圍村舊味，除了大時大節全村民圍埋食盆菜，William 媽媽仍煮着屏山鄧氏的老味道。「呢隻神仙鴨係爺爺留落嚟，呢隻神仙鴨係屏山先有㗎！」鄧媽媽說。咁大隻神仙鴨以為新年大節才會出現，地位猶如盆菜，原來是鄧家的家常菜，「煮咗幾十年啦，而家連工人都識煮！」鄧媽媽笑說。William 未算盡得媽媽真傳，反而細佬學得較好，「佢煮西餐好好食，好似之前嘅聖誕節大餐。」媽媽補充。William 指因曾放洋海外，故多數煮西餐，如意大利菜，本身不會吃太肥食物，也不會鮑參翅肚，每星期兩次返家吃飯，媽媽更特別煲定靚湯，最得 William 心的一定是木瓜花生雞腳湯和南北杏無花果白菜湯。William 特別愛吃芋頭，今次特別用上朋友帶來的紹關芋頭煮家傳菜臘味炆芋頭，秘方是必定要加以小茴和八角浸的水，可以令芋頭有陣獨特香味，就是這朕屬於回家才有的味道。
(原文摘自《U Magazine》文：飛、圖：程佩媚、邱鴻基、林霖、關耀祥、Joey、sky)
