近年有不少新商場新商廈新大型住宅在本為舊區的觀塘落成，令這區起了變化，新祥發粉麵茶餐廳在觀塘經營了 15 個年頭，看着該區不斷發展，面對着租金上漲，加埋人工燈油火蠟等開支，老闆娘黃太表示其實所賺無幾，雖然經營環境艱難，但仍咬緊牙關，希望做得幾耐得幾耐。
新祥發位於人來人往的協和街，一到夜晚，門外兩排火爐火光熊熊，尤其在寒冷天氣，能吸引路過的人入去食番個煲仔飯取暖。煲仔飯由晚上 6 點開始供應，負責煮煲仔飯的玲姐，一接到柯打就快手就腳舀米、落水，待煲至差不多收水，放材料、淋豬油繼續煲，還周不時轉動個瓦煲，要讓飯燒得均勻，採訪當晚，見玲姐要一眼關七，車輪手不停煲，攝影師着她動作慢少少拍個照都唔容易，因柯打一個接一個。
店舖的煲仔飯大約有廿多款選擇，黃太表示較受歡迎的是土魷肉餅，而她本人就最喜歡香芋章魚雞粒，另外她亦大力推介黑椒牛扒，因巿面較少有用來做煲仔飯，一試之下，牛扒煮得剛好，飯帶黑椒和焦香，黃太的確冇介紹錯。
黑椒牛扒煲仔飯 $58
牛扒煮得剛好，肉質嫩腍不鞋口，煮得乾身的飯粒帶着黑椒的香辣，飯焦亦很香脆，有驚喜！
炸菜田雞煲仔飯 $67
田雞不算好多肉，但勝在夠滑，配上炸菜，很惹味。
土魷肉餅煲仔飯 $58
肉餅肥瘦參半，混以煙韌土魷，又滑又有咬口，最滋味的食法是淋上豉油拌勻來食。
香芋章魚雞粒煲仔飯 $65
芋頭當造粉嫩，與章魚和雞粒很夾配，未食先被香味吸引。
師傅飯 $57
不是很多地方有供應，內有臘肉、臘腸、膶腸，將所有臘味切粒煲飯，舀入口滿是油香。
在店外炮製煲仔飯，招徠不少路過的客人幫襯。
負責煮煲仔飯的玲姐，每晚6點開始就忙不停，有時柯打多至要兩個人才應付得到。轉動個煲。
新祥發採用泰國米，要先浸 1 小時；待飯及材料差不多熟，淋上豬油再煲一會，令整煲飯更香。
新祥發粉麵茶餐廳
地址：觀塘協和街 123-125 號地下
電話：2343 5868
營業時間：6pm-3:30am
煲仔飯供應時間：6pm-12pm
原文刊載自U Magazine
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
