我知，韓風太凜烈了，但韓國刨冰有少少 out 啦，今回我去咗北海道‧‧‧‧‧‧唔係，個 body 去咗希雲街，偏偏個味覺坐直航去咗北海道嘅「氷屋」，係咪好吸引呢？呢間刨冰店，賣日本刨冰，由北海道嚟嘅 Shingo 開設，開咗 3 個幾月，但人氣爆棚呀，大家都知我幾鍾意日本啦，知香港有得食，專登嚟試。
Shingo 專登喺家鄉運咗部刨冰機嚟，刨出嚟嘅冰一片片，好輕好軟綿綿，一入就好似陳風咁融化。大家睇卡通片，啲主角食嘅刨冰都會加入杰撻撻、又彩色到近乎熒光嘅糖漿，唔使驚，呢度食嘅精緻好多，因為所有全部都係 Shingo 自己做，無色素㗎，用日本來嘅京都抹茶粉、紅豆、鹿兒島紫薯等製，有草莓、朱古力、豆腐、紫薯同抹茶糖漿等口味，仲可以加黃豆粉、十勝紅豆、白玉、咖啡果凍、朱古力、芝麻、五色 mochi 等嘅 topping，咁多款揀，我要一個刨冰挑戰 10 款！
我嗰日就試咗宇治金時同豆腐 2 款，嘩！個抹茶好京都呀，抹茶醬食落有甘味好濃、仲有少少新鮮嘅抺茶青味，配搭嘅糖漿用咗京都來嘅抹茶粉製，紅豆都好好味，飽滿又粉甜，無乜人工味，原來係十勝紅豆，若果你係抺茶控，你會畀嗰陣抹茶回甘味迷魂。
不過，講驚喜，反而係本來以為會淡茂茂嘅豆腐味，個刨冰啲豆腐味堅揪濃郁，一啖入口，真係好似食堅日本絹豆腐咁，原來 Shingo 將真豆腐攪成糖漿，刨冰裏面仲有日本豆腐雪糕，好濃豆味，少少甜，驚喜度我畀 10,000 分。Shingo 仲會不時推出期間限定的新口味刨冰，之前出過波子汽水味、鹿兒島紫薯味，啱啱我碌佢哋 fb，仲見到出咗櫻花刨冰，次次嚟都有新意。
我要推介埋呢度仲可以體驗埋和式品茶方式，呢度有一款和菓子抹茶套餐，日本空運來的和菓子，會配一碗傳統抹茶，Shingo 會用日本傳統方法攪拌茶粉，唔......抹茶超甘濃.....吃完甜甜嘅和菓子，再飲啖抹茶，嗒真啲，甘味即係溫和咗喎。
唔記得講，舖頭 Shari Shari 名係食刨冰時所發出的聲音，係咪好有詩意呢？天氣開始暖啦，快啲嚟降溫啦。
Shari Shari Kakigori House
地址：銅鑼灣希雲道 14 號地下
電話：2529 1223
營業時間：星期日至四 1pm-11pm，星期五及六 1pm-12mn
想睇更多？即上 甜品 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
