呢間有火鍋食嘅醫院餐廳，就係佐敦伊利沙伯醫院嘅新恆輝食堂。雖然呢度係醫院職員餐廳，但老闆都會招呼街外客，老闆話唔少住喺醫院附近君頤峰嘅街坊都會去食飯，客氣啲同老細講聲就無問題！
今次專程去餐廳試食火鍋，選擇得一款，係醉雞煲，聽講冬天仲有羊腩煲！醉雞煲湯底一上枱打開蓋，濃郁嘅藥材味即時湧出！睇睇個湯底，有大量紅棗、杞子、薑、黨參、當歸等藥材，勁足料！雖然湯底藥材味偏濃，但唔會有苦味，飲完成日暖笠笠！
老闆仲好貼心咁放定碗藥材湯畀你加，保證食到尾都仲有藥材味，唔會淡如水！不過藥材愈滾愈出味，最後都係要加水稀釋吓。
醉雞煲 $150（湯底連一隻雞）
湯底足料令人滿意，醉雞煲嘅另一主角—雞都唔會令你失望！雞件與湯底分開上，齋睇賣相，雞件好厚肉、脹卜卜，有花雕酒浸住 keep 住酒味之餘，仲唔會令雞件變乾。呢度就有一隻雞嘅分量，究竟呢個醉雞鍋幾錢？答案係：$150！一隻雞加個湯底，真係抵到不得了！
百幾蚊我估都係冰鮮雞多，老闆話係用咗三黃雞，雞肉好滑又有雞味，即使係雞胸都唔會嚡口！雞皮下面無多餘嘅脂肪，唔會咬到成口雞油兼食到好油膩！
火鍋料拼盤 $160
淨係食雞有啲寡？嗌多個火鍋料拼盤啦，食豪啲。拼盤有大、細之分，圖中係大 size，堆到成座小山丘咁！拼盤用生菜及粉絲墊底，上面有肥牛、駝鳥肉、鮑魚片、雞柳、魚肉、花枝片，仲有牛丸、墨魚丸，鯪魚球及貢丸，用料唔可以同高級火鍋店比，但都算新鮮，百零蚊咁豐富，回本喇！
肥牛唔算太多脂肪，牛味尚算突出。
雞柳雖然無醃味，但食唔到有雪藏嘅味道。
魚柳都大大片，而且好厚肉。
小記最愛駝鳥肉，肉質嫩滑無渣，肉汁豐富！
又唔係樣樣都十全十美嘅！唯一要彈嘅係呢碟豉油，唔夠鹹仲隱若有酸味，加咗幾條辣椒絲都無辣味。
火鍋抵食之外，呢度嘅小菜一樣出色！即叫即炒小菜有 55 款。三人套餐包括一碟菜及兩碟小菜，加多 3 碗白飯，盛惠 $106！
炒菜可以揀蒜蓉、白烚、清炒等，今次揀咗椒絲腐乳炒通菜。腐乳汁夠濃味，通菜吸晒腐乳汁，好惹味。
另一名菜鹹魚煎肉餅，整成細細塊嘅 size。肉餅唔會有太多肥豬肉，質地唔會死實實，仲有肉汁。不過比較薄身，如果可以整厚身啲，咬落口感好啲，更滿足。
西檸雞都是餐廳嘅招牌小菜，雞肉切成條狀，再上粉漿脆炸，然後加西檸汁快炒拌勻。雞件嘅炸漿唔算厚，雞肉及炸漿唔會分離。沾滿西檸汁嘅炸雞件好開胃，送飯一流！
新恆輝食堂
電話：2384 5625
營業時間：6:30am-8pm（逢星期日休息）
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
