住在寶琳的吃貨朋友常堅持話呢區唔係美食沙漠，只要識得左穿右插，穿梭於幾個大商場和地標之間，隨時搵到好嘢食，有啲 sell 足料自製，有啲大件抵食取勝。
1 超入味瑞士汁大雞髀
寶琳為食喵喺港式小食店，腸粉燒賣碗仔翅撈麵，幾乎你諗得出嘅街頭小食都有。點取捨？街坊力推瑞士大雞髀，size 有掌心咁大，瑞士汁顏色唔算深，但皮連肉都係啡色，證明浸到入晒味！食落果然入味，醬汁鹹甜適中，肉質又嫩滑，好多師奶都嚟加料。除咗雞髀，個人推介超抵食又特別嘅炸燒賣，外脆內軟，灑啲椒鹽粉食，超級惹味。
瑞士汁大雞髀 $15
巴掌般大隻兼厚肉，瑞士汁入味，鹹中帶甜。
炸燒賣$ 10/10 粒
外面脆脆哋，內裏軟腍，一蚊一粒，平到無朋友。
寶琳為食喵
地址：寶琳街市 84 號舖
電話：從缺
營業時間：12pm-不定時（逢星期二休息）
2 自家搓製足料粉仔
喺「寶琳為食喵」隔幾間舖，有「寶琳粉仔」，沒有花多眼亂的餐點紙，集中火力賣粉仔加幾款涼拌小食。吃貨朋友再三叮囑，雖然舖頭下午四點打後先開，都唔好錯過。果然，距離開舖仲有十分鐘，已見到有街坊待候，就知堅係好嘢。粉仔係它闆自家搓製嘅，口感比一般小食檔有彈性，不糊口；湯頭亦非常清甜，令豬油渣甘香更顯突出，最讚係夠爽，無油膉味；想食辣啲，可加多幾羹辣菜脯。粉仔以外，仲有涼拌小食：酸辣雞翼尖，夠醒胃，肉質不會太稔，啜完骨啜埋手指。
粉仔 $15
老闆細心到將花生、葱花、菜脯及豬油渣等配料與粉仔分開，不用怕配料泡腍，這份心思經已加分。
除了粉仔外，店內的涼拌小食亦十分受歡迎。
酸辣雞翼尖 $10
一包有 6 隻，酸酸辣辣又入味。
寶琳粉仔
地址：寶琳街市 86 號舖
電話：從缺
營業時間：4:30pm-不定時（逢星期一休息）
3 前衛沙嗲雞蛋仔
街坊話我知，寶琳除咗新都城，仲有一個屋苑叫慧安園，佢個商場感覺暗暗好舊，其實卧虎藏龍。推開玻璃門，已閒到陣陣沙嗲香氣，來自主打自家炒製沙嗲乜乜乜的靚食園。雖然近年蛋雞仔及格仔餅已經玩到出神入化，早已見慣不怪，但見到呢度嘅沙嗲醬雞蛋仔，還是有點疑惑。唔係格仔餅和雞蛋仔淋沙嗲醬喎，係將沙嗲醬加入去粉漿，即係啖啖都食到沙嗲味？
先講格仔餅，拎上手香氣撲鼻，沙嗲味勁香，一口咬落去，食得到沙茶醬及花生的香味，帶些少微辣，再配以格仔餅本身的煉奶、牛油等配醬，雖然又鹹又甜又辣，出乎意料地夾喎。至於雞仔，外脆內軟不在話下，因為夠薄身，沙嗲味更突出，一粒接一粒，吃不停口！老闆說，沙嗲醬是自己製造，由配方到炒製不假外求，而家粉漿亦悉心調校過，食落比較稔糯。
沙嗲格仔餅、沙嗲雞蛋仔 各式各樣18
即叫即製，既熱辣辣又聞到濃郁的沙嗲香，推介。
靚食園
地址：將軍澳寶琳毓雅里 9 號慧安商場地下 A14 號
電話：從缺
營業時間：不定
4 學生最愛 Oreo 奶茶
在靚食園隔離有擠滿學生的「聰明豆小食店」，賣的都是學生最愛的章魚小丸子、雪糕格仔餅及特式飲品，見到有幾個學生們都點了雪糕格仔餅及 Oreo 奶茶，應該係招牌作，即刻買嚟試！雪糕與格仔餅的配搭確是不錯，格仔餅即叫即烘，夠香脆，配埋雪糕，冰火交融確係正。至於 Oreo 奶茶，茶味較淡，但勝在 Oreo 餅碎味重搭夠，都幾特別啦！
雪糕格仔餅，有朱古力、呍呢嗱、士多啤梨、菠蘿、椰子及芒果味雪糕可以選擇。
價錢$20
Oreo 奶茶 $12
Oreo 奶茶茶色較淡，但勝在 Oreo 餅落得夠重手。
聰明豆小食店
地址：將軍澳寶琳毓雅里 9 號慧安商場地下 A13 號
電話：從缺
營業時間：不定
5 大過塊面提子椰絲包
要搜羅該區抵食好嘢，必定要問每日為頭家慳得一蚊得一蚊的師奶！同師奶們八卦到，新都城街市的「新芝美餅店」，麵包抵食夾大件，各款麵包只賣 $11/3 個，係窮人恩物；最讚係幾分鐘就有新鮮麵包出爐。靚太店員話：「我哋貨真價實，小本經營，麵包夠新鮮。」最驚喜係喺度發現比頭還要大的椰絲提子大腳板，成個包遮住我塊面！食落麵包鬆軟，有陣陣椰絲香，買一個夠食三餐，絕對係糧尾必備。
椰絲提子大腳板 $12
Size 大過塊面！麵包鬆軟，甜甜地，椰絲和提子分量多，足料！
起初以為睇錯，各款麵包只賣 $11/3 個，而且更是正常 size，真係 unbelievable。
新芝美餅店
地址：將軍澳新都城街市二期 M3 舖
電話：從缺
營業時間：不定
文、攝：Theo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
