60 年老字號 富記粥品 10.5 分
富記有六十幾年歷史,由車仔檔做起,多年來以粥品和燒鵝聞名,尤其一味燒鵝粥,坊間少見,連食家蔡瀾都推薦。地方雖較地踎,但因價錢經濟,午晚市都座無虛席。
燒鵝髀瀨粉 $70
試食報告
燒鵝:4 皮薄、脂肪少,咬落帶脆,甘香,鵝肉醃味適中,少少羶,略嫌口感偏實。 |
湯底:3 帶香味,味道不錯。 |
瀨粉:3.5 軟滑得來索到湯味。 |
總分:10.5
小評:4 間店之中以這裏的價錢最抵,而且質素有水準,皮脆肉又 juicy,加上地點就腳,食得過。
富記粥品
地址:旺角花園街 104-106 號舖
電話:2385 1230
營業時間:7:30am-11:30pm
養殖場新鮮直送 天鴻燒鵝飯店 8 分
元朗區有名燒味小店,大部分客人都為燒鵝而來,選用佛山黑鬃鵝,最大賣點是每朝由養殖場將新鮮劏好的鵝直送到店中,不經雪藏,特別新鮮;用秘製香料醃製,上皮後風乾 6 小時再燒,鵝皮油份特別豐厚。
燒鵝髀瀨粉
試食報告
燒鵝:3.5 鵝髀勁大隻,脂肪較多,皮咬落唔脆,不過尚算甘香,肉質軟滑。 |
湯底:2 偏鹹,欠缺香味。 |
瀨粉:2.5 口感嚡嚡地,唔夠香滑。 |
總分:8
小評:燒鵝皮不脆又唔夠鬆化,鵝肉雖滑,但羶味過重,要靠酸梅醬減低羶味。鵝髀雖比其他 3 間較大,但價錢亦相對高。
天鴻燒鵝飯店
地址:元朗建業街 88 號仁義大廈地下 D 舖
電話:2474 8849
營業時間:11am-3pm、5pm-10:30pm
3 年米芝蓮推介 一樂燒鵝 13 分
連續 3 年獲米芝蓮推介,總店在大埔區有五六十年歷史,走出新界屹立中環也有多年,朱老闆跟老父學做燒臘,用爐底放有火山石的太空爐燒製,火力更均勻,燒鵝隻隻修腰企身。老闆每朝 9 點就開始燒鵝,再因應供求而配合出爐,過時過節一日可以賣過百隻!
鵝髀瀨粉 $102
試食報告
燒鵝:4.5 皮跟肉有點分離,但入口微脆鬆化又甘香,浸過湯都唔韌,肉質幾滑,醃得入味,完全不羶。 |
湯底:4.5 勁香,應加了大量鵝骨來熬,味道鮮濃。 |
瀨粉:4 軟滑,索晒湯的香味,超正! |
總分:13
小評:賣相雖不算最吸引,但燒鵝髀咬落皮微脆又甘香,肉汁依然豐富,醃味濃重,辟去了羶味,加上湯底夠香濃配瀨粉,超夾!
一樂燒鵝
地址:中環士丹利街 34-38 號
電話:2524 3882
營業時間:10am-8:30pm
西環街坊人龍店 波記燒臘粉麵店 12.5 分
有 40 多年歷史,由街邊檔賣到入舖,一向以燒味馳名區內,以燒鵝最受街坊追捧,每日限量供應,堂食分得仔細,燒鵝、全髀、全胸任君選擇,燒鵝髀最搶手,很多時中午已沽清,去年獲米芝蓮推介後,更一度開門即現人龍。
燒鵝髀瀨 $85
試食報告
燒鵝:5 賣相最靚,皮光滑挺身,色澤油潤均勻,咬下去皮薄香脆,肉軟滑多汁,帶香味又無過重調味。 |
湯底:4 一般的雲吞麵湯,有陣陣大地魚香,不過配搭瀨粉略淡。 |
瀨粉:3.5 軟滑,但唔係好索到湯味。 |
總分:12.5
小評:燒鵝賣相最吸引,而且皮薄香脆,肉質軟滑,調味不重,吃到的都是鵝肉的天然香味,湯底好清香,只是配瀨粉略嫌淡了一點。
波記燒臘粉麵店
地址:西環皇后大道西 425號地下
電話:不詳
營業時間:星期一至六 11:30am-10:30pm,星期日休息
總結:一樂燒鵝 勝!
幾間燒鵝名店,分佈喺港九新界區,每間都係區內王者。一齊較量,一樂燒鵝與波記叮噹馬頭!論鵝髀,波記的略略優勝,皮光滑油潤兼香脆,肉滑多汁;一樂呢?都好高分,入口酥化甘香,肉滑之餘,醃味又做得好,加埋湯底有鵝肉鵝骨香甜味,瀨粉又吸味,每個項目「表現」都好平均,所以今次評一樂燒鵝勝!
歡迎你 like 我哋 U Food Facebook Page / U Food Instagram ,取得我哋更新更快嘅資訊!