真心推！茶餐廳必吃下午茶

最Hit食訊

發佈: 2016.10.06

文:

太興．鮑汁雞翼撈公仔麵

鮑汁雞翼撈公仔麵 $43
去太興其實唔一定要食燒味，下午茶來到，太興其實都有幾多選擇，由炒粉麵、西多三文治到公仔麵，一應俱全，仲會時不時換新口味。不過講到必食推介，我會揀「鮑汁雞翼撈公仔麵」，首先「鮑汁」已經比瑞士汁豪氣，鮑汁同公仔麵撈得勻，夠晒入味；麵身煮得不太腍，每口都食到鮑汁的甜香，幾開胃，連 3 隻雞翼都索晒鮑汁，啖啖肉，好滿足。

雞翼肉質幾嫩滑，夠入味。

公仔麵身幾爽彈，不會過腍，每啖都充滿鮑汁。

info
各太興
下午茶時段：2pm-6pm

金記冰室．Q 版西多士

Q 版西多士餐 $38
金記冰室近年狂開分店，現在分店已經有 5 間，不過就全部坐落港島區。下午茶餐來說，佢最多選擇，大大話話有廿多款，飽肚的都有８至９款炒粉麵飯，想輕食亦有十幾款三文治炸髀雞翼可選擇。心水推介係佢個「Q 版西多士餐」，雖然話係 Q 版，但西多 size 都唔細，以一片麵包蘸滿蛋醬半煎炸，但食來完全唔油膩，仲食到蛋香，絕對考功夫，加上豉油雞翼，微微炸過，香口不油膩，有豉油香。仲重本地配紅豆冰，唔用花奶改加椰汁，味道更香，紅豆大粒起沙，好高質！

西多士雖然只得一塊麵包又冇餡料，但香口唔油膩，仲食到蛋香。

唔用花奶，改用椰汁的紅豆冰，味道更香，紅豆又夠大粒起沙。

info
金記冰室
地址：銅鑼灣霎東街 5 號地下
電話：2206 4448
下午茶時段：2pm - 6:30pm

澳門茶餐廳．豬扒豬仔包餐

澳門豬扒豬仔包伴煙肉腸仔卷 $39
雖然依家葡撻唔算大熱，但去親澳門茶餐廳都會「啪」兩個，論味道，絕對冇得輸。除葡撻，仲必定會食豬扒豬仔包，麵包做到外脆內軟，豬扒軟腍得來幾有豬肉香。如果下午茶食的話，都幾划算，除豬扒包外，仲配埋煙肉腸仔，個人覺得最驚喜，反而是伴碟的沙律菜，一般茶記的沙律菜，一定唔食﹔但澳茶呢個沙律菜，新鮮無苦澀味，而且分量超多，拌日式麻醬，好醒胃。

雖然係下午茶餐，但絕不欺場，麵包外脆內軟，豬扒夠腍，而且熱到燙手！

info
澳門茶餐廳
地址：銅鑼灣謝斐道 477-481 號肇明大廈地舖 A 連 1 樓
電話：2572 3113
下午茶時段：2:30pm - 6:30pm

翠華．魚蛋片頭河

至潮魚蛋片頭河 $42
講到翠華，其中一樣出名的是魚湯，魚蛋河更可以話係必食 item 之一。平時一碗「至潮魚蛋片頭河」要 $36，加埋飲品，五十幾蚊先落得樓。下午茶餐只係 $42，就算加 $3 轉凍飲，都係 $45，差唔多平近廿蚊，都算抵食。下午茶分量與平時無分別，魚蛋粉係配魚湯，魚蛋加埋片頭有 5 片，彈牙爽口有魚味，河粉索晒魚湯，最後可以連個湯都飲埋。

魚蛋夠彈牙爽口。