荃新天地嘅「板長」原來一直都有放題，真係收得好密實！可能只係荃灣友先知。放題只限星期一至五，撞正假期會暫停供應。分 3 個時段，入座起計食足 90 分鐘，價錢由 $198 起跳，黃金時段最貴 $218，食物款式一樣。
餐廳大部分是卡位，私隱度高、可以同朋友自成一角！試食當日揀咗星期四晚 5pm，呢個時段係最平，去到竟然全店滿座！
食物選擇比坊間嘅放題少，分刺身、壽司、炸物、一品料理等 9 大類，總共 76 款食物。
刺身 花款多！
落單後 5 分鐘內已經有刺身上，有
三文魚、鹿兒島鰹魚、甜蝦、北寄貝、劍魚腩、油甘魚、北海道帆立貝、希靈魚、螺片及
馬刀貝，花款幾多喎。刺身算新鮮，仲厚切，三文魚、劍魚腩無筋，但甜蝦肉質比較腍又淡味，質素不過不失。
劍魚腩 推！
推介劍魚腩，超級肥美！感覺好似咀嚼緊一嚿脂肪咁。
北寄貝 推！
北寄貝肉質爽彈，有陣陣海水味亦滲出甜味。
【精選放題】
顏值最高！好抵任食雞煲火鍋
火炙平目魚背 讚！
香芒吉列蝦卷 伏！
壽司及軍艦款式只得 18 款，好少！仲要係得三文魚、帆立貝、劍魚等大路選擇。香芒吉列蝦卷，芒果片好甜，但中間嘅炸蝦好腍，失望。火炙芝士三文魚味道不過不失，反而火炙平目魚背有驚喜，帶有焦香嘅魚油香味與酸酸哋嘅飯好夾！
放題飲品是任飲，有
百事、7喜、美蓮達，但最正是有得任飲獅威啤酒。
香草香白汁煮青口 唔韌！
青口用鍋上，好吸引呀！一鍋有 15 隻，亦夾雜了少許雞髀菇絲及本菇。香草白汁味道比較鹹，有蒜香又有忌廉味。青口質地唔太韌，但本身嘅海水味加埋白汁味，食多兩隻就覺得好鹹。
吉列廣島蠔 讚！
三文魚鮫 伏！
炸物有 9 款選擇，炸軟殼蟹有 1/4 隻，但天婦羅炸漿比較厚，而且炸得唔夠乾身，變得又油又腍。吉列廣島蠔嘅炸醬好薄，炸得金黃香脆。廣島蠔無炸到縮水，蠔身厚肉、蠔味濃郁。三文魚鮫完全無味，魚肉鬆散，根本唔知自己食緊咩魚！
汁炒墨魚嘴 讚！
坊間嘅放題少見墨魚嘴，呢碗汁炒墨魚嘴分量多到好似小菜咁！墨魚嘴爽脆，配以蒜芯一齊以辣微嘅醬汁炒，惹味到想撈飯食！
【熱爆小食】
Oreo + 阿華田 + 麻糬 $10 爆餡車輪餅
【和味放送】
北海道 + 加拿大 + 韓國 排隊平食三色海膽飯
鐵板燒魷魚 讚！
鐵板燒魷魚有濃濃嘅黑椒味，魷魚爽彈，佐酒最啱！韓風雞球不太乾，只是說好的韓風不見了，只得黑椒味！
牛舌 無牛味！
一份兩片，牛舌出奇地腍，用筷子輕輕一𠝹就輕易散開。牛舌雖然軟腍，但欠缺牛脂香。
蟹皇粥 真係有蟹！
飽肚嘅料理有牛肉雜菜鍋及番茄海鮮鍋，亦有拉麵及烏冬。不過最吸引嘅係原鍋上枱嘅蟹皇粥，上枱時熱辣辣，粥面有好多蟹油。粥內有 2 嚿蟹件，蟹肉唔算多。粥底好綿，但其實都幾飽肚，自問係大胃皇先好挑戰！
【今期掃場】
葵廣情報 update！5 大必去新登場食店
甜品 無雪糕，so sad！
甜品無雪糕食，只得
奶凍、芝士蛋糕及
和菓子。奶凍有紅豆味及芒果味，小記獲得一個錯體奶凍，於紅豆奶凍上再加芒果，好豐富，味道不過不失啦。
|
總評：
以板長平日消費來說，$198 放題真係大特賣，不能有太多要求。放題的食物選擇較少，但食物水準尚算合格，如果平日經常幫襯散點，又或想平平哋食刺身和食，都食得過。服務配套方面，漏單的情況不算嚴重，唔會食到一肚氣；最得食記歡心係可以任飲啤酒，cheers！
|
板長壽司
地址：荃灣楊屋道 18 號荃新天地 2 期 UG 82-83 號舖
電話：2673 6220
營業時間：11:30am-10:30pm
放題供應時段：星期一至五，假日暫停
收費：
5pm-7pm $198/ 成人、$128/ 小童
7pm-9pm $218/ 成人、$128/ 小童
9pm-10:30pm $198/ 成人、$128/ 小童
文、攝：Jessie
【本周必去】
西貢趁墟！廟會 12 大必掃小食
【精選甜食】
好多圓！「芋」字頭甜品
【名牌精品】
Angelina 名物朱古力奶 超市都買到
歡迎你 like 我哋 U Food Facebook Page / U Food Instagram ，取得我哋更新更快嘅資訊！
