旺角掃台灣街頭小食 冰烤番薯冰感幼滑似雪糕！

旺角登打士街向來有九龍「食街」之稱，一間間小食店相連，掃街都可以掃到飽！

當中的新台場台灣小食於2017年3月底開業，主打有餡芋圓、麻辣鹽水雞、胡椒餅等，其中芋圓最受歡迎，加上仙草和刨冰消暑一流。

台灣小食店最近推出新一批食品，包括有1款甜食以及3款鹹食，開賣幾日已吸引到不少Fans前往覓食；小編個人最喜歡的，非冰感軟滑的冰烤番薯莫屬，睇睇各款新品推介！

1. 冰烤番薯 $10 

熱辣辣的烤（煨）番薯香港多處都有小販檔售賣，凍食的烤番薯則比較罕見。

小食店的冰烤番薯由台灣直送，工場先將台農57號黃番薯烤熟，再將它急凍；出售前微微解凍，番薯本身的的渣不多，凍食（連皮食）口感特別軟滑兼香甜，入口化開，好味！

顧客亦可選擇熱食，不過味道跟普通煨番薯分別不大，不推介。

2. 綜合貢丸湯 $20

選用兩款手打丸，包括原味貢丸和杞子丸，彈牙爽口。杞子丸比較罕見，當中加入當歸粉，份量不多不帶濃烈藥材味，但有滋補的感覺。

3. 蜜糖炒豬手 $35

這款蜜糖炒豬手於早前的美食展攤位相當好賣，豬皮部份又香又煙韌，炒香後淋上蜜糖尤其惹味。

4. 香辣茶葉蛋 $8/隻；$15/兩隻

4款新出小食中，茶葉蛋就相對普通了。剝開雞蛋，雖然茶色明顯，食落茶香卻不算突出，辣味亦未見很有驚喜。不過茶葉蛋新鮮製作，存放時間不會太久，蛋黃仍保持軟滑，加分。

台灣食品以外，小食店亦推出兩款特飲，分別是嫩仙草奶茶（$22）和百香檸檬蜜（$22），點選炒豬手、綜合芋圓、鹽水雞等食品可加錢加配。

其中，嫩仙草奶茶以新鮮牛奶製作，比坊間用淡奶的口感更順滑，加上味道帶甘的仙草不太甜膩，不妨一試！

新台場台灣小食

地點:旺角廣華街1號仁安大廈地下24A舖   

開放時間:星期一至四 12:30pm-9:30pm/ 星期五至日 12:30pm-10:00pm

電話:2885-3080

文：HK港生活