終於等到天氣轉涼啦~係時候烚吓烚吓！
近年大熱既粥底蒸鮮鍋動輒都要兩三百蚊先有交易，不過最近一粥麵就引入咗新既特製鍋具，可以响半邊粥鍋上即蒸海鮮，下層就嚟一個暖笠笠既生滾粥，盡吸上層食材精華。今次選用既食材配搭亦絕不馬虎，靚肥牛呢啲只係基本嘢，龍躉、海蝦、帆立貝、花雕醉雞呢啲先係真章！
優質海鮮夠鮮味 粥底軟綿香滑十足
以即拉腸粉、鮮料生滾粥穩座連鎖粥麵店龍頭既一粥麵，估唔到咁識得抓緊蒸鮮鍋熱潮！近排推出既「龍躉海蝦肥牛鍋」相信已經有唔少人試過，龍躉片夠晒厚肉，份量十足；海蝦亦鮮甜彈牙，今次既海鮮真係新鮮得好有驚喜；而肥牛則會嚴選脂肪均勻既美國肥牛，食落甘香肉味濃郁。而11月21日就會由「帆立貝手打三寶丸肥牛鍋」接力，帆立貝淨係單睇圓周直徑都嬴晒，而且肉質飽滿，味道鮮甜，配埋手打豬肉丸、墨魚丸同鯪魚球呢啲手工食材，完全係實力派既表現。
鍾意食醉雞既朋友就有福氣，因為一粥麵今期特別研發新口味「去骨花雕醉雞雜錦鍋」，花雕酒香四溢，雞肉烚完保持嫩滑，仲要去埋骨，值得一讚！而個粥底都唔好錯過，因為係師傅精心熬製既魚湯粥底，仲用咗鯛魚、豬骨、雞同白胡椒等一齊烹煮，唔怪得之個底咁綿滑啦~今個秋冬，一個人都可以烚得好浪漫！
「帆立貝手打三寶丸肥牛鍋」有豬肉丸、墨魚丸同鯪魚球，手打丸類夠彈牙，食得出用料好紥實；帆立貝份量十足，鮮甜肥美，完全滿足到海鮮迷既慾望！加埋肥瘦均勻既美國肥牛同新鮮蔬菜盤，呢個晚餐好豐盛呀！
「龍躉海蝦肥牛鍋」鮮嫩厚肉，海蝦爽口彈牙，配埋手工雲吞同肥牛，試過就知無介紹錯！
「去骨花雕醉雞雜錦鍋」既醉雞酒味香醇，單食醉雞都夠飽肚，仲有其他如豬膶、鯇魚片等，一個人食都可以好精采！
唔夠喉咩?仲可以單點美國肥牛、手工雲吞、油條等，加埋杯珍寶凍荔枝紅茶，Yummy！
用粥底去烚肥牛，牛肉更加滑身之餘，生滾粥又盡吸精華，又點會唔好食！
資料提供：一粥麵
