小儀：中環隱世日菜店

因為就算你幾熟中環，佢匿埋喺石板街賣 party 用品嘅鐡皮檔後面，間舖又細到坐到十零人，包保你行過一定會走漏眼，我要強調：「隱世」真係好適合嘅形容詞。

睇門面搵食，從來係蠢蠢豬嘅事，唔好睇呢度無華麗裝修就睇低佢一綫喎，我嚟過一次之後，好快又再約朋友嚟食，水準好好喎。主要原因係呢度有好吹得水、又好煮得嘅大廚撑場搭救。大廚樂師傅，做過老牌鐵板燒店「松菱」、有馬、稻菊同水車屋，學嘅係正宗日本菜，今次攞全副身家出嚟開舖，係盡地一「舖」，所以絕對唔敢怠慢，否則蝕嘅係自己錢，於是攞晒啲好嘢出嚟同食客分享。

全店最正最正最正，梗係個 10 層海膽杯啦，最底層數起：日本新鮮海草 > 北海道海膽 > 三文魚子粒 > 海膽 > 拖羅蓉 > 海膽 > 黑魚子醬等，十合一嘅豪華，夠 gimmick 食到人哋牙骹軟呀，樂師傅開舖時呢個杯得 7 層，今日發展到 10 層，目標係向 12 層進發，嘩！美味版 ICC 呀？個個爭住叫是常識吧，但係每日得 10 杯，想再叫多杯都無呀。

喺呢度開飯，真係娛樂性十足，個海膽 ICC 都未 K.O. 晒，好有紅館感覺嘅壽司就上枱啦，說是遲那時快，見唔見到我前面碟壽司着咗火，嘩嘩嘩！壽司底加清酒點火，香噴噴，芝士半融，壽司仲多咗清酒香味，刺激又好玩。

呢度仲有好多刁鑽食材㗎，我嗰班吃盡日本嘅朋友，嗰日一聽到呢度有「腦天」食就癲咗。「腦天」係吞拿魚嘅天靈蓋，一條魚切出幾多片唧？超矜貴，食落質地似大拖羅，但味道甘啲濃啲、又唔會好油膩，啲日本人好鬼精，留返自己食，香港好少日本料理供應，$98 一塊你以為好貴？識貨嘅朋友話喺築地都唔止呢個價啦，我都數唔到班友仔當日吔咗幾多個「天靈蓋」啦，真係把嘴刁民。

S2 Kitchen
地址：中環威靈頓街 51 號地庫 A 舖（石板街口）
電話：2885 8803
營業時間：星期一至五 11am-3pm、6pm -10:30pm，星期六及公眾假期 1pm-11pm，星期日休息

想睇更多？即上 中區 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！