小儀：懷舊寶島國小開餐

不過，大家嚟之前，要做好心理準備，因為今日我哋要迷失工廠區，嚟個時光倒流先。

借咗五月天架「時光機」，蕉蕉蕉，話咁快就嚟到咗，咦！呢度咪就係 1950 年嘅寶島國民小學，啲木書枱真高度真係 fit 晒我，仲有啲舊屏風、彈珠機、日本漫畫同古董家具，估唔到我做咗慧芸李，時光倒流差唔多 70 年。

唔通連個天都特別眷顧我？撞正國小放飯時間，我呢啲長期玩緊 hunger game 嘅同學仔，唔使老師叫，都會自動打餐牌研究研究。話明係寶島國小，食物梗係台味甚濃，嘩！乜學校飯堂咁好餸，香酥雞、台式牛肉麵、藥膳排骨湯飯、手工水餃、香葱雞，碟碟台味十足，分便當、湯飯同麵 3 款，仲有跟足台灣學校飯堂咁跟一小碟醃菜，再睇埋價錢，都算幾抵，怪唔得餐廳侍應話段段時間都塞滿「同學仔」開餐。

呢間「學校飯堂」好鬼照顧我哋呢啲 David 妹、David 仔，大胃妹，大胃仔呀！特登請由台灣請咗兩位有 20 多年功力嘅廚師返嚟主理，為做出 100% 寶島味，醬油、麻油、米酒、滷水香料都係台灣嚟，呢度仲有寶島嚟嘅關廟麵、雞絲麵同意麵，好正。

我要推介呢度嘅藥膳排骨湯飯、三杯雞同香葱雞絲撈麵，藥膳湯嘅排骨同埋當歸、玉竹、川芎杞子燉，又腍又有藥材香，食完成身都暖晒；三杯雞九層塔味好香，好惹味，分量唔少，但好好送飯；香葱雞絲撈麵我最冧，用上好好0趙嘅台灣油麵，撈埋台灣葱油，香死人啦，唔好睇小佢，細細碗都好鬼飽飽。

好飽飽添！都無乜心機上當囉，都係坐時光機返去 2016 年嘅香港，返歸做一做元帥先。

小時光
地址：觀塘興業街 16-18 號美興工業大廈第1期 A 及 B 座 1 樓 C1 室
電話：3188 2380
營業時間：星期一 12nn-6pm，星期二至日 12nn-9:30pm

想睇更多？即上 Cafe 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！