$70 有找！4 大高 CP 值鰻魚飯

鰻魚飯 $40

呢個鰻魚飯已經係全場最貴！鰻魚即叫即喺廚房嘅鐵板上煎香，有手掌咁大條，$40 真係物有所值！

鰻魚比較軟腍，口感綿綿的，係鐵板上煎過，鰻魚帶焦香味，有魚脂嘅香氣。

飯就比較失色，唔係用日本珍珠米。飯味唔太香甜，不過飯嘅分量勁多，大男人都食得飽。

小卷廚房

地址：紅磡寶其利街 53 號寶利閣地下 1 號舖

電話：9315 4455

營業時間：11:30am-11pm

味道有層次│菊月町

觀塘鴻圖道嘅餐廳，貴到杜汶澤都要上網鬧爆！或者佢真係火遮眼，其實喺鴻圖道都有平嘢食，仲要係日本菜！「菊月町」晚市有 $800 廚師發辦，但午市食物價錢好鬼平，鰻魚飯、牛肉生薑燒飯、豚肉生薑燒飯都只係 $58，仲跟甜品！買完飯仲可以行 5 分鐘去觀塘海濱食，吹吓海風好寫意！

蒲燒鰻魚飯 $58

鰻魚飯即叫即製，唔係預先做好，有柯打就放上飯面。鰻魚食落仲係暖暖的，魚腥味都少啲啦！

鰻魚質地唔係平時食慣嘅軟腍腍，比較爽彈。鰻魚唔油膩，魚肉白淨新鮮。鰻汁不會一味死鹹，微甜、醬油味偏重，有層次。

飯是日本珍珠米，帶有甜味，但飯粒比較硬及乾，好在廚師加入沙律醬，再拌鰻魚汁，增添濕潤感又令味道層次更豐富。

菊月町

地址：觀塘鴻圖道 46 號世紀工商中心地舖 1A

電話： 6588 5354

營業時間： 11am-10pm

【本周必食】 期間限定！7 仔宇治抹茶軟雪糕

葵廣巨型芝士鰻魚飯│Happy Toast

葵涌廣場真係乜都有得食！鰻魚飯呢啲熱門嘢又點會少呢？係 2 樓嘅 Happy Toast 憑住紫薯牛角包及半條鰻魚牛角包，喺葵廣站穩陣腳。上星期推出芝士滑蛋鰻魚蓋飯，即衝去食！

芝士滑蛋鰻魚蓋飯 $60（試食價）、$72（原價）

又話 $70 有找？係呀，而家 like 佢哋嘅 Facebook 專頁就可以用試食價 $60 食到。

鰻魚 size 一啲都唔細！成隻餐叉咁長，大約 6cm 左右。

炒蛋即叫即炒，蛋味濃郁，食落好滑又唔油膩。不過記得早啲開蓋食呀，好易焗到變老蛋！

飯係珍珠米但米味唔太突出，鰻魚汁質地濃稠，偏甜口，醬汁味香。鰻魚肉厚身、肉結實，魚皮嘅脂肪比較多，好甘香惹味，但芝士味偏少。

Happy Toast

地址：葵芳葵富路 7 號葵涌廣場 2 樓 2005 號舖

電話：從缺

營業時間：12pm-10:00pm

【葵廣特搜】 救命啊！葵廣喪飲藍紫血包

任添鰻魚汁│和食快餐

位於荃灣昌寧商場嘅「和食快餐」，出晒名大大碗飯、大堆頭嘅餸，食到捧住個肚走。食唔晒，可以打包返屋企當宵夜，抵啦！

鰻魚飯 $58

鰻魚大大塊，同個碗一樣咁長，魚肉仲好厚身但食落又唔油膩，鰻魚汁仲任加任添，一啲都唔孤寒！

和食快餐

地址：荃灣西櫻樓角路荃昌中心昌寧商場地 下23 號鋪

電話：2413 0678

營業時間：9:00am-9:30pm

文、攝：Jessie

【美食激鬥】 4 個最 hit 海鮮丼 邊碗最掂？

【相關連結】 流心爆芝！鰻魚 x 奄列漢堡

【本周注目】 跟住星星朝聖 4 間快去米芝蓮餐廳