大家都知我幾為食妹啦，舊年當我知佢要榮休一段日子，我個胃就同我投訴話佢想當黯然喎，作為胃嘅主人，我同佢一樣不能不能黯然更多。
隱伏多時嘅梁師傅，終於出返山，真係為食妹嘅福音。梁師傅真係好鍾意煮嘢，就算休息期間，都無停過諗新菜，今次嚟探佢，梗係由佢發辦。吓！梁師傅「揸流灘」？東‧坡‧肉當新菜，我傻，梁男神都唔係傻啦。你「烘」埋啲張圖睇下先啦！有無覺得塊東坡肉有啲唔同，睇唔到？出動最強大腦睇真啲啦！係咪覺得嚿肉點解好似只有肥肉部分呢？話你知，你唔好話畀人知喎，唔係肉嚟㗎，係用冬瓜扮㗎，係「冬」坡肉先啱，實不相瞞，我當日都畀佢呃鑊金，梁師傅，你呃人！
呢嚿係古惑的冬坡肉，我盲舂舂咁食，好有肉味㗎，明明話係冬瓜做，中間釀咗五花腩、冬菇同馬蹄同雞蛋，加埋上面啲烘乾巴馬火腿，我直頭以為係金華火腿埋嘅芡，配煨到入晒味嘅鬆化冬瓜肉，肉少菜多，好味得嚟好健康。中菜平時都多油多芡，少咗啲健康元素，所以佢今次回歸，新菜都係走健康路綫，另一款「翡翠夜明珠」都好清新、好驚喜，星斑配芫茜，魚肉超滑又清香，配咗個好似蟹膏嘅南瓜雞湯，口腔裏面爆發小清新。
我仲要推介埋梁師傅上個月去深圳做 guest chef 交流研究出嚟嘅炸鮮奶。又話係炸鮮奶？質地好似布甸咁，半固體滑嘟嘟...梁師傅笑笑口，唔係布甸嚟㗎，一滴忌廉都無落，真係起鑊到不斷煮、不斷煮出韌性，10 零分鐘就做到好似而家咁嘅布甸感覺，包起鬆化嘅麵包裏面，真係停唔到口。廚神回歸真係古惑招盡出。
個火鴨方同金銀包都好好食，火鴨方配蝦膠撈咗芫茜，面一個創意嘅桂花蒜蓉汁，有齊晒鹹香、甜香；金銀包就用蛋皮包住菜粒、花膠粒同鮑魚粒，最細心係加咗番薯粒粒，「無牙婆」都𡁻得開開心心。男神回歸，真係冧爆我個胃，有啖好食靠晒你啦。
海景軒
地址：尖沙咀麼地道 70 號海景嘉福酒店 B2 層
電話：2731 2883
營業時間：星期一至六 11:30am - 3pm、6pm - 10:30pm，星期日 10:30am - 3pm、6pm - 10:30pm
《原文摘自 U Magazine 494》
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
