活着的博物館 永香冰室
土瓜灣區最有名的白宮冰室，幸好有呼吸咖啡茶館接棒，留住冰室風格。但區內原來有另一間冰室，仍然 keep 住真‧老派風格，叫「永香冰室」。位於蘋果街巿附近，舖仔細細，裝修 60 年來不變，靠天然光及幾枝光管照明，沒有冷氣靠吊扇及對流窗通風，真係似回到六七十年代窮日子。食物方面數十年如一日，多士三文治鮮牛通腿蛋麵，飲品如冰紅茶、㗎啡、檸檬茶蜜、菠蘿冰等，你可以話好平凡，但都係經典中嘅經典，而且價錢平，反通脹，有老冰室風骨，真心服務街坊。
吊扇、白光燈、舊鏡子、綠色牆身和瓷磚牆，一派老冰室格局，又帶點家常感覺。
通花窗框、磨砂玻璃加上木卡座，無花無假，係幾十年前款式。
平日不少街坊來打躉。
奶茶濃香，茶味偏重，是老一輩的口味。
平凡的蛋治，雞蛋有濃郁蛋香，麵包軟熟，比許多大型茶餐廳有水準。
窩蛋多士街外少有，窩蛋中間流心，先用叉子戳破，蛋黃夾多士一起吃，很滿足。
樓宇牆上都有冰室宣傳字句，證明冰室與這個社區真的分不開了。
永香冰室
地址：土瓜灣炮仗街 29 號地下
電話：2712 1452
營業時間：8am - 7pm
首家冷氣開放冰室 義興冰廳
美東村係九龍城區老屋邨，邨內有一間開業 41 年的「義興冰廳」，門口是搶眼趟大的招牌帳篷，數十年前對面是九龍城寨，有投注站、銀行、街市，好不熱鬧。義興更是當年首間冷氣開放的屋邨冰室，好鬼威水。
最興盛時期，每到下午三點新鮮出爐大麥包、菠蘿包、蛋撻等，街坊大排長龍。不過隨着城寨拆去，人口老化，客人少了，冰室唯有賣來貨的麵包西餅，不過公司三文治、油占多、肉丁煎蛋麵配凍菜蜜等茶記招牌仍然即點即製，對於我嚟講，講 feel 嘅冰室，食物簡簡單單就夠了。
典型的冰室水吧，你睇嗰幅花磚牆，好懷舊！
肉丁餐蛋即食麵，蛋同餐肉即點即煎，熱辣辣，唔似一般茶餐廳般貪快預早煎好晒。
公司三文治都係舊味道，很足料，逼爆晒！
油占多即烘，微微帶焦又香又脆，而家只有老人家才識欣賞。
舊掛畫、舊 Poster，顯露了歷史痕跡。
義興冰廳
地址：九龍城美東村美東樓 118-121 號
電話：從缺
營業時間：7am - 6pm
賣足 40 年最正豬扒麵 東門冰室
冰室都有最正豬扒麵，仲要賣足 40 年。紅磡最出名嘅豬扒麵出品自「東門冰室」，開放式廚房設計，茶記裝修卻通風良好，在座位等食時聞到陣陣煎豬扒香流口水，但好彩唔覺好大油煙。
豬扒最正之處在於鬆軟，厚身豬扒大大塊，分量十足。豬扒由老闆娘親自醃製，落足蒜、薑及酒，收舖前便會將豬扒醃好並放在雪櫃裏冷藏過夜，醃得夠耐又入味。Order 後即煎，咬落好香口又多汁。另外鱆魚餅亦十分推薦，用真鱆魚打成，真材實料。
自家製鱆魚餅，吃到粒粒鱆魚和菜粒，有口感。
豬扒即點即煎，新鮮熱辣；醃得入味得來鬆軟，加上廚師手勢了得，豬扒不乾身，仲有肉汁添！
豬膶即食麵湯底濃香，豬膶爽滑沒異味。
紙皮石、印花磚牆，每天街坊都如回家般到來打牙骹。
東門冰室
地址：紅磡曲街 16 號地下
電話：2334 1285
營業時間：6am - 6pm
見證茶果嶺歲月 榮華冰室
原來茶果嶺從前係大麻石礦場，好多打石業的客家人聚居。現時仍在茶果嶺的「榮華冰室」，已開業 50 多年，見證茶果嶺的滄海桑田。
冰廳有大紅字招牌掛於大門上，室內仍有三葉吊扇配白光管燈，心形雕花木卡座位，仲有舊式汽水櫃。最吸睛的是牆上的懷舊海報，還有題字水銀鏡、黑白相片、發黃的隨地吐痰告示，雖然都係賣街坊價茶記食物如餐蛋麵、凍啡奶茶，但身處其中，像時光倒流 70 年般，外面的世界已然隔絕，真正抖到啖氣。
厚重高靠背的卡座，一睇就知舊款式，坐得特別舒服。
好邪惡的餐蛋麵，搗破蛋黃，用蛋汁拌即食麵，好吃！
門口像間舊式士多。
榮華冰室
地址︰茶果嶺大街 106 號 A
電話：從缺
營業時間︰7am - 5pm
文：Celia
歡迎你 like 我哋 U Food Facebook Page / U Food Instagram ，取得我哋更新更快嘅資訊！
