我真係睇住 Jamie Oliver 成長㗎，由佢着住 Track suit 揸住綿羊仔，好青葱咁去街市買餸嗰輯 The Naked Chef 開始，我就有捧佢場，佢真係好鬼鬼馬，得得意意咁，到佢開咗 Fifteen 我都好想去試。諗呀容易，動身就難，一拖 N 年，佢由最初得一間社企 Fifteen，到而家全球都有嘅 Jamie's Italian，佢都變咗英國飲食大亨囉，今年我居然喺無心插柳嘅情況下試咗 2 間，一間係年頭同《U Magazine》去咗倫敦排佢旗下人龍懷舊餐廳 Union Jack，今日我又高速走咗去排隊排到癲嘅登龍街 Midtown 新開的Jamie's Italian，同 Jamie say 個 hi，多年心願兩招了！
Jamie's Italian 係佢旗下全球分店最多嘅餐廳，大家知占美囝囝份人幾崇尚 natural，好支持農民，所以呢條 line 咁，用咗唔少英國同意大利啲傳統小農場搵啲靚材料返嚟，好似肉類咁，用嘅係英國 free-range chicken、意國百年老字號 Levoni 唔同款式嘅煙肉同火腿、仲有 San Marzano 意大利番茄，水年芝士、綿羊芝士都係嚟自英國，想試晒呢啲靚料，可以試 cured meats plank，一盤齊晒，留意喎！我餵占美囝囝粒橄欖，都係拼盤裏面嘅好嘢嚟，橄欖味超鮮又唔會鹹死人，搞到我食到着咗魔，魔鬼果然在細節！
唔得唔提呢度仲有好多款自製意粉，引入咗一部銅製嘅意粉機嚟做 homemade pasta，有扁麵、寬條麵、長通粉、可釀入餡料的 Cannelloni 及波浪邊 Pappardelle 6 款，我嗰日試咗個蝦意粉，加咗魚湯煮個醬，啲意粉滑滑地、軟軟地又韌韌地，想試下意大利新鮮嘅 pasta 口味，不妨試。餐廳闢咗個手製意粉 corner，位置就係起扶手梯旁邊，想睇下意粉點做出嚟，唔好怕醜啦企埋去昅下，我見啲廚師無停手咁整意粉，嘩！條條都好 fresh。
睇到呢度嘅讀者，對我咁支持，呢個時候係我回饋你哋，私人分享 2 個開心大發現畀大家知。首先梗係送免排貼士畀大，經我明查暗訪，發現周日 3pm 至 5pm 通常都係七八成 full，walk in 幾乎係直入咁滯，唔想等，記住呢啲時候嚟；而更大嘅發現，係呢度好似比倫敦店平啲啲，但菜式用料幾乎 99% the same，Yeah！咁着數都唔來吃吓，真係枉為香港人囉。
Cured Meats Plank $79 位
Prawn Linguine $100、$165
Free-range chicken $165
Jamie’s Italian
地址：銅鑼灣登龍街 1 號金朝陽中心二期 2 樓
電話：3598 2222
營業時間：12nn - 11:30pm
(原文摘自《U Magazine》ISSUE 468、文：小儀、圖：Nova)
↓【限時搶⚡】位元堂凍乾水果脆套裝！↓
↓ 冷凍乾燥技術鎖住濃濃果香！/ 保留營養素及豐富膳食纖維！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
