雜港包大對決

老字號VS新力軍

50 年漢堡始祖 愈做愈出色
「我爸爸創作咗雜港包，當年大家都唔知係乜，無人問津，後來 70 年代麥當勞嚟咗香港，漢堡包變成大紅人！時新呢個招牌經歷過高低潮，近 7、8 年生意再上軌道，我哋都唔係食古不化，改用電腦系統出飛到廚房，加推豚肉漢堡包，又特製圓形模整好漢堡扒，每日平均做 2 千塊都無問題，應付到多流量又保持質素。近年愈來愈旺，我就愈做愈有勁！」老字號時新快餐店第二負責人二哥說。

時新快餐店
地址：紅磡黃埔街 1A 地下
電話：2362 1279

誠意快餐店 重點出擊
「我跟細佬兩個本來做燒味師傅，咪睇我個樣咁後生，都做咗十幾年喇！做燒味好麻甩呀，所以想轉型，覺得茶餐及快餐類的食物感覺年輕啲。於是我哋喺屋企不斷去試，漢堡扒的肉點整會嫩滑多汁、炒蛋要夠滑身、雞扒炸到外脆內軟，全部試到好我哋先去租舖做呢間餐廳。餐牌選擇唔多，但都係我哋嘅重點出擊！」新力軍民食燒味漢堡茶餐公司老闆黎先生說。

民食燒味漢堡茶餐公司
地址：紅磡黃埔街 6 號
電話：2766 3666

港式漢堡包仲有幾多？

港島區稱冠
位於灣仔的樂景快餐店，被稱之為「港島區時新」，店中漢堡包一向是大紅人，日賣百多個，拍得住炒粉麵飯。芝麻包烘過底面，漢堡扒用鮮牛肉，加入洋葱之餘亦有麵包糠，質地鬆化唔會硬過化石。不止客人歡喜，連日日對住的店員都食佢做早餐，就知道係好嘢。

樂景快餐店
地址：灣仔巴路士街 17 號
電話：2572 1843

套餐之選
葵涌區有間老式快餐店，漢堡包有得散賣，但套餐更受歡迎，因即炸薯條好脆口。漢堡扒是自家製，可惜太多醬汁，蓋過了牛肉味。

食口福
地址：葵涌和宜合道 58 號
電話：2427 6383


醬汁打孖上
每次去西貢出海，都會去利口福食早餐，其漢堡包最特別是有齊茄汁及沙律醬。不過麵包壓到扁撻撻，賣相麻麻。

利口福小食店
地址：西貢普通道 58 號
電話：2792 2903


少年食神激撑
鍾意捐窿捐罅搵食的少年食神 Michael，在何文田長大，愛民邨商場內的天馬快餐店，佢由細食到大。從前餐廳只得最基本款式的漢堡包，但嘴刁的 Michael 要求老闆加蛋又加芝士，變到大大份，自此呢個包被命名「Michael 漢堡包」。此包還有番茄及椰菜絲等餡料，跟西式漢堡包較相似。

天馬快餐
地址：何文田愛民邨愛民商場 G6C 舖
電話：2711 7760


牛肉太薄
又是一間隱身屋邨的快餐店，牛肉味道唔錯，不過太薄，又比較細件，只可當下午茶過吓口癮。

美廉快餐店
地址：大圍美林邨美林商場 2 樓 38 - 39 號舖
電話：2605 7110


地點就腳
禮頓道旁的丹麥餅店已經好多人識，在黃金地段去食個包好方便。不過唔係即叫即做，麵包及牛肉都唔熱，麵包仲好油，誠意欠奉。

丹麥餅店
地址：銅鑼灣禮頓道 106 號禮信大廈地下
電話：2576 7353

(原文摘自《U Magazine》文：黃茵 圖：Sky、Ki)